27 студзеня, Мінск /Кар. БЕЛТА/. Дзярждума Расіі на пасяджэнні ў сераду аднагалосна ратыфікавала ўнесенае прэзідэнтам Уладзімірам Пуціным пагадненне аб прадаўжэнні на пяць гадоў Дагавора паміж РФ і ЗША аб мерах па далейшым скарачэнні і абмежаванні стратэгічных наступальных узбраенняў (ДСНУ), паведамляе ТАСС.
26 студзеня амерыканскі і расійскі бакі абмяняліся нотамі аб прадаўжэнні ДСНУ. У сваёй ноце пасольства ЗША ў РФ прапанавала ў адпаведнасці з палажэннямі дагавора прадоўжыць тэрмін яго дзеяння на пяць гадоў да 5 лютага 2026 года. Расійскае МЗС са свайго боку пацвердзіла прымальнасць гэтай прапановы для Расійскай Федэрацыі.
Расія і ЗША падпісалі ДСНУ ў 2010 годзе. Згодна з яго ўмовамі, кожны з бакоў скарачае свае СНУ такім чынам, каб праз сем гадоў пасля ўступлення дакумента ў сілу і ў далейшым іх сумарныя колькасці не перавышалі 700 разгорнутых міжкантынентальных балістычных ракет (МБР), балістычных ракет падводных лодак (БРПЛ) і цяжкіх бамбардзіроўшчыкаў (ЦБ), 1550 боезарадаў на іх, 800 разгорнутых і неразгорнутых пускавых установак МБР, БРПЛ і ЦБ.-0-
