16 чэрвеня, Мінск /Кар. БЕЛТА/. Спартсменкі "Вікторыі" са Смалявіч выраўнавалі становішча ў фінальнай серыі жаночага чэмпіянату Беларусі па хакеі на траве, паведамляе карэспандэнт БЕЛТА.
15 чэрвеня ў другой сустрэчы ў Гродне дзеючыя чэмпіёнкі краіны перамаглі ў серыі пасляматчавых булітаў мясцовы "Рытм" - 4:3 (гульнявы час - 2:2). 14 чэрвеня гродзенская каманда перамагла з сухім лікам 3:0. Дзве наступныя сустрэчы адбудуцца 19 і 20 чэрвеня ў Смалявічах. У серыі за бронзавыя ўзнагароды ХК "Мінск" двойчы ўпэўнена перайграў на сваім полі баранавіцкі клуб "Тэкстыльшчык-БарДУ" - 3:1 і 5:0. Трэці паядынак пройдзе 19 чэрвеня ў Баранавічах.
У залатой серыі мужчынскага першынства пакуль парытэт. У першай гульні чэмпіён краіны ХК "Мінск" выйграў у брэсцкага "Будаўніка" з рэзультатам 5:3, а потым госці ўзялі рэванш - 2:1. Цяпер сапернікі сустрэнуцца ў Брэсце 16 і 17 чэрвеня. У паўфіналах "Мінск" двойчы разграміў СДЮШАР "Брэстжылбуд"- 14:0 і 8:0, а "Будаўнік" быў мацнейшы за сапернікаў з клуба "Гроднааблспорт" - 17:1 і 5:0.
У серыі за бронзавыя ўзнагароды гродзенскія спартсмены двойчы абыгралі брастаўчан на сваёй пляцоўцы - 2:0 і 6:0. Наступны матч пройдзе ў Брэсце 16 чэрвеня.
З 1996 па 2013 год чэмпіёнам Беларусі станавіўся "Будаўнік", а з 2014-га золата нязменна выйграе толькі ХК "Мінск".
Усе медальныя серыі прадоўжацца да трох перамог адной з каманд.-0-
