4 красавіка, Мінск /Кар. БЕЛТА/. У Нацыянальным алімпійскім камітэце Рэспублікі Беларусь адбылося ўшаноўванне прызёраў ІІ зімовых Міжнародных спартыўных гульняў "Дзеці Азіі", паведамляе карэспандэнт БЕЛТА.
Міжнародныя спаборніцтвы для юных спартсменаў праходзілі з 23 лютага па 5 сакавіка ў Кемераўскай вобласці. На Гульнях "Дзеці Азіі" беларуская каманда заваявала 1 залатую, 5 сярэбраных і 5 бронзавых узнагарод. Чэмпіёнкай спаборніцтваў у канькабежным спорце на дыстанцыі 3000 м стала Паліна Сівец, у актыве якой таксама два другія месцы (1500 м і мас-старт). Тры медалі міжнароднага старту выйграў і шорт-трэкіст Данііл Бычкоў (серабро ў змешанай эстафеце і па бронзе на дыстанцыі 500 м і ў каманднай гонцы ў юнакоў). Разам з Даніілам на подыум у змешаным старце падняліся Мацвей Магер, Дар'я Сцяпанава і Ксенія Лукашэвіч, а ў юнацкай эстафеце трэцімі сталі Мацвей Магер, Раман Зяленін і Цімафей Жук.
Акрамя таго, сярэбраны медаль на Гульнях "Дзеці Азіі" заваявалі скакуха на лыжах з трампліна Ева Бядрыцкая і лыжнік Канстанцін Каспяровіч (эстафета дружбы). Уладальнікамі бронзавых узнагарод турніру ў Кузбасе сталі фігурыст Васіль Барахоўскі, лыжніца Вікторыя Жамкова (эстафета дружбы), а таксама канькабежцы Раман Чарняўскі, Фёдар Данілаў і Радамір Мінін (камандны спрынт).
"Зусім нядаўна, паўтара месяца таму, мы праводзілі вас на гэтыя спаборніцтвы. Сёння нагода нашай сустрэчы не менш хвалюючая, але больш прыемная - мы віншуем вас з медалямі, якія вы заваявалі. Акрамя таго, мы аддаём належнае яшчэ і трэнерскім штабам, а таксама вашым родным і блізкім: вы прыйшлі да гэтых вынікаў усе разам, - адзначыў Прэзідэнт НАК Беларусі Віктар Лукашэнка. - Шлях на алімпійскія вяршыні пачынаецца менавіта з гэтага ўзросту. Усе нашы вялікія спартсмены стартавалі на такіх спаборніцтвах, а праз гады падымаліся на алімпійскія п'едэсталы. Упэўнены, гэтыя старты далі вам не толькі вопыт удзелу, але і дазволілі вам набыць новыя знаёмствы, якія вы, магчыма, пранесяце праз усё жыццё. Для вас гэта толькі пачатак, жадаю, каб у будучым мы ўбачылі вашы фатаграфіі ў нашай Зале алімпійскай славы, няхай вашы кар'еры складуцца паспяхова. Ведайце, што мы са свайго боку прыкладзём усе намаганні, каб вы прадаўжалі ўдзельнічаць у міжнародных спаборніцтвах".
"Хачу ад усёй каманды падзякаваць Нацыянальнаму алімпійскаму камітэту за магчымасць прадставіць нашу краіну на Гульнях "Дзеці Азіі", а ўсіх балельшчыкаў - за падтрымку, - сказала чэмпіёнка спаборніцтваў па канькабежным спорце Паліна Сівец. - Гэты старт стаў для нас першым за доўгі час адсутнасці на міжнародных форумах, і мы былі вельмі рады прыняць у ім удзел. Калі мы стаялі на п'едэстале гонару, нас перапаўняла гордасць. Упэўнена, што ў спартсменаў нашага пакалення самыя вялікія перамогі яшчэ наперадзе".
Удзел у ІІ зімовых Міжнародных спартыўных гульнях "Дзеці Азіі" прынялі больш як 850 юных спартсменаў з 12 краін, беларускую каманду прадставілі 68 атлетаў. Усяго на Гульнях было разыграна 57 камплектаў узнагарод.-0-
