23 мая, Мінск /Кар. БЕЛТА/. Брэсцкі дынамавец Міхаіл Гардзяйчук стаў лепшым іграком 9-га тура футбольнага чэмпіянату Беларусі па версіі асацыяцыі "Беларуская федэрацыя футбола", паведамляе карэспандэнт БЕЛТА.
У звышрэзультатыўным паядынку з футбалістамі "Гомеля" (3:3) 33-гадовы нападаючы брастаўчан тройчы паразіў вароты, гэта першы хет-трык у матчах 33-га чэмпіянату краіны. У гэтым першынстве ў актыве Міхаіла Гардзейчука 4 забітыя мячы. Аўтарам самага прыгожага гола мінулага ўік-энду прызнаны паўабаронца барысаўскага БАТЭ Валерый Грамыка, які эфектным далёкім ударам паразіў вароты "Іслачы". Гэта сустрэча завяршылася ўнічыю - 1:1.
Вынікі астатніх матчаў: "Дынама" (Мінск) - "Энергетык-БДУ" (Мінск) - 2:0, "Тарпеда-БелАЗ" (Жодзіна) - "Нафтан" (Наваполацк) - 5:0, "Белшына" (Бабруйск) - "Нёман" (Гродна) - 0:2, "Славія" (Мазыр) - "Слуцк" - 1:0, "Смаргонь" - "Шахцёр" (Салігорск) - 1:3. Футбалісты "Мінска" прапускалі гэты тур.
Становішча ў лідзіруючай групе цяпер такое: "Дынама" (Мінск) - 24 ачкі (9 матчаў), "Тарпеда-БелАЗ" - 20 (8), "Нёман" - 19 (8), БАТЭ - 15 (9). Унізе турнірнай табліцы "Шахцёр", "Белшына" і "Энергетык-БДУ".
У наступным туры сустракаюцца:
24 мая
"Нёман" - "Тарпеда-БелАЗ", БАТЭ - "Славія";
26 мая
"Гомель" - "Смаргонь", "Шахцёр" - "Белшына";
27 мая
"Нафтан" - "Іслач", "Энергетык-БДУ" - "Дынама" (Брэст), "Мінск" - "Дынама" (Мінск).
Футбалісты "Слуцка" прапускаюць гэты тур.-0-
