31 сакавіка, Мінск /Кар. БЕЛТА/. У беларускай хакейнай экстралізе прадаўжаецца паўфінальная стадыя розыгрышу Кубка Прэзідэнта, паведамляе карэспандэнт БЕЛТА.
30 сакавіка высвятляць адносіны ў паўфінале экстралігі прадоўжылі хакеісты "Металурга" і "Шахцёра". Пасля двух матчаў у Салігорску, у якіх сапернікі абмяняліся перамогамі, серыя пераехала ў Жлобін. Трэці паядынак процістаяння выдаўся найменш выніковым з усіх: на дваіх каманды закінулі ўсяго дзве шайбы, абедзве на рахунку дзеючых чэмпіёнаў Беларусі. У чужыя вароты па разе трапілі форварды "Металурга" Ігар Угольнікаў і Аляксей Міхноў. Такім чынам, жлобінскі клуб выйшаў наперад у серыі да чатырох перамог - 2:1, наступны матч дуэлі адбудзецца ў суботу таксама на дамашняй пляцоўцы "стальных ваўкоў".
31 сакавіка пройдзе трэці паядынак у іншай паўфінальнай пары Кубка Прэзідэнта, дзе "Юнацтва" змагаецца з "Нёманам". Дзве першыя гульні "беларускага класіка", якія адбыліся ў Гродне, завяршыліся на карысць мінскай каманды (2:1 і 3:1). Чарговая сустрэча стартуе на лёдзе сталічнай "Чыжоўка-Арэны" ў 19.30.-0-
