8 чэрвеня, Мінск /Кар. БЕЛТА/. У сезоне 2022/2023 Маладзёжнай хакейнай лігі будзе выступаць беларускі клуб "Дынама-Шыннік" з Бабруйска, паведамілі БЕЛТА ў прэс-службе Федэрацыі хакея Беларусі.
"Дынама-Шыннік" ужо выступала ў МХЛ: каманда адыграла ў турніры чатыры сезоны (з 2011 па 2015 год) і тройчы выходзіла ў плэй-оф. У будучым сезоне Маладзёжнай хакейнай лігі "Дынама-Шыннік" будзе гуляць у дывізіёне "Сярэбраны" Заходняй канферэнцыі.
"Мы шчаслівыя, што на карце МХЛ зноў з'явіўся беларускі клуб. У нашай краіне створаны ўсе ўмовы для заняткаў хакеем і развіцця гэтага віду спорту як на ўзроўні клубных, так і зборных каманд, - адзначыў старшыня ФХБ Аляксандр Багдановіч. - Удзел у Маладзёжнай хакейнай лізе - гэта важны стратэгічны праект, які дасць самым таленавітым маладым ігракам Беларусі магчымасць прафесійнага развіцця і дазволіць ім расці праз канкурэнцыю ў моцнай міжнароднай лізе".
"Рады прыняць у склад удзельнікаў МХЛ каманду з Беларусі. Вяртанне ў лігу "Дынама-Шынніка" - плюс для развіцця беларускага хакея і добрая магчымасць прагрэсіраваць для маладых ігракоў, - перакананы віцэ-прэзідэнт КХЛ па развіцці маладзёжнага хакея Аляксандр Гуськоў. - У свой час клуб з Бабруйска быў адным з самых наведвальных у лізе. У наступным сезоне ён будзе гуляць на "Бабруйск-Арэне", дзе праводзіліся матчы КХЛ і створаны ўсе неабходныя ўмовы".
Усяго ў новым сезоне МХЛ прымуць удзел 37 каманд, падзеленых на дзве канферэнцыі, у кожнай з якіх будзе па два дывізіёны. Дзеючым уладальнікам галоўнага трафея лігі - Кубка Харламава - з'яўляецца СКА-1946 з Санкт-Пецярбурга.-0-
