Сцяг Панядзелак, 15 красавіка 2024
Усе навіны
Усе навіны
Спорт
08 лютага 2024, 09:00

Беларускія хакеісты стартавалі на Кубку Будучыні з перамогі над Казахстанам-U20 

8 лютага, Мінск /Кар. БЕЛТА/. На пляцоўцы сталічнай "Чыжоўка-Арэны" стартаваў міжнародны турнір па хакеі Кубак Будучыні з удзелам лепшых маладых ігракоў з трох краін, паведамляе карэспандэнт БЕЛТА.

Удзел у спаборніцтвах прымаюць маладзёжныя зборныя Беларусі і Казахстана (да 20 гадоў), а таксама дзве юніёрскія каманды Расіі (да 17 і да 18 гадоў). У сваім стартавым матчы на турніры нашы хакеісты сустракаліся з казахстанскімі равеснікамі, якія ў мінулым снежні заваявалі пуцёўку ў элітны дывізіён маладзёжнага чэмпіянату свету, абышоўшы зборныя Даніі, Францыі, Аўстрыі, Венгрыі і Японіі.

Лік у паядынку быў адкрыты ўжо на чацвёртай мінуце сустрэчы, калі вызначыўся форвард беларусаў Канстанцін Валачко. Незадоўга да адыходу на першы перапынак гаспадары лёду падвоілі перавагу намаганнямі Ільі Лахнова. Сваю дэбютную шайбу на турніры казахі закінулі ў сярэдзіне другога перыяду, але ўсяго праз пяць мінут Арцём Нікіціч вярнуў нашай камандзе перавагу ў дзве шайбы. Праўда, за некалькі секунд да адпраўкі ў раздзявалкі госці скарацілі адставанне да мінімуму, і трэці перыяд сапернікі пачалі пры ліку 3:2. Там нашы хакеісты шайбаў у свае вароты не дапусцілі, пры гэтым паразіўшы цэль яшчэ двойчы - галамі вызначыліся Сцяпан Звягін і Данііл Ліпскі. Вынік матча - 5:2.

У матчы адкрыцця турніру каманда Расіі-U18 абыграла зборную Расіі-U17 з лікам 5:3. 9 лютага нашыя хакеісты сустрэнуцца з Расіяй-U17, а казахі будуць змагацца з Расіяй-U18. У заключны дзень, у суботу, адбудзецца паядынак Казахстана-U20 з малодшым расійскім складам, а завершыць праграму Кубка матч беларусаў і старэйшай расійскай каманды.

Сёння ў рамках спаборніцтваў пройдзе турнір па хакеі ў фармаце 3х3. У першым паўфінале, які стартуе ў 15.00, сыдуцца абедзве расійскія зборныя, на гадзіну пазней за другую пуцёўку ў фінал нашы хлопцы паспрачаюцца з казахстанскімі равеснікамі. Гульня за трэцяе месца пачнецца ў 17.00, а вырашальны паядынак запланаваны на 18.00.-0-

 Фота Сяргея Шэлега 

Падпісвайцеся на нас у
Twitter
Топ-навіны
Свежыя навіны Беларусі