9 ліпеня, Мінск /Кар. БЕЛТА/. Пяціразовая чэмпіёнка свету па сучасным пяцібор'і Настасся Пракапенка стала пераможцай трэцяга этапу Кубка Паўла Ляднёва, які праходзіць у Мінску, паведамляе карэспандэнт БЕЛТА.
Перад фінальным відам праграмы лідзіравала другая беларуска - Ірына Прасянцова. На старце лазер-рана Пракапенка ўступала сяброўцы па камандзе 20 секунд, але ў ходзе дыстанцыі апярэдзіла суайчынніцу і выйграла этап. Прасянцова ў выніку стала другой, следам за ёю фінішавала прадстаўніца Расіі Гульназ Губайдуліна.
У другі дзень спаборніцтваў з турніру знялася пераможца двух першых этапаў Кубка Ляднёва беларуска Вольга Сілкіна. Нягледзячы на сход спартсменкі, зборная Беларусі стала лепшай у камандным першынстве, набраўшы 4189 балаў. Каманда Расіі заняла другую пазіцыю (4141), трэцяе месца дасталася другой зборнай Беларусі (4132).
У суботу медалі ў асабістым турніры на трэцім этапе Кубка Ляднёва па сучасным пяцібор'і разыгрываюць мужчыны.-0-
