8 чэрвеня, Мінск /Кар. БЕЛТА/. У жаночым адзіночным разрадзе адкрытага чэмпіянату Францыі па тэнісе ў Парыжы сёння стануць вядомы ўдзельніцы фінальнага паядынку, паведамляе карэспандэнт БЕЛТА.
У першым паўфінальным матчы другая ракетка свету беларуска Арына Сабаленка сустрэнецца з чэшскай тэнісісткай Каралінай Мухавай, якая займае 43-е месца ў сусветным рэйтынгу. Да гэтага яны толькі адзін раз сустракаліся паміж сабой - у 2019 годзе ў паўфінале малога падагульняючага турніру WTA ў кітайскім Чжухаі Сабаленка ва ўпартай барацьбе адолела Мухаву ў двух сэтах - 7:5, 7:6. На шляху да свайго першага паўфіналу "Ралан Гарос" лепшая беларуская тэнісістка яшчэ не аддала саперніцам ніводнага сэта, па чарзе абыграўшы ўкраінку Марту Касцюк (39-ы нумар сусветнага рэйтынгу) - 6:3, 6:2, беларуску Ірыну Шымановіч (214) - 7:5, 6:2, расіянку Камілу Рахімаву (82) - 6:2, 6:2, амерыканку Слоан Стывенс (30) - 7:6 (7:5), 6:4 і яшчэ адну ўкраінку Эліну Світоліну (192) - 6:4, 6:4.
У другім сённяшнім паўфінале саперніцай лідара сусветнага рэйтынгу польскай тэнісісткі Ігі Свёнтак будзе бразільянка Беатрыс Хадад Мая (14).
Паўфінальныя сустрэчы мужчынскага адзіночнага разраду пройдуць заўтра. Першы нумар рэйтынгу АТР іспанец Карлас Алькарас сустрэнецца з сербам Новакам Джокавічам (7), а нарвежац Каспер Рууд (4) будзе сапернічаць з прадстаўніком Германіі Аляксандрам Зверавым (27).-0-
