2 лютага, Мінск /Кар. БЕЛТА/. Пра інфармацыю аб накапленні сродкаў на "другую пенсію" можна будзе даведацца праз мабільны дадатак, паведаміла журналістам кіраўнік Фонду сацыяльнай абароны насельніцтва Міністэрства працы і сацыяльнай абароны Юлія Берднікава, перадае карэспандэнт БЕЛТА.
Міністэрства працы і сацыяльнай абароны з 1 лютага 2023 года запусціла мабільны дадатак па аператыўным кантролі за выплатай узносаў і працягласці страхавога стажу. У ім рэалізавана мноства функцыянальных магчымасцей, але ў перспектыве плануецца адкрыць доступ да яшчэ больш шырокай інфармацыі.
Паводле слоў Юліі Берднікавай, ад грамадзян паступіла пытанне, ці з'явяцца ў дадатку звесткі аб добраахвотным страхаванні дадатковай накапляльнай пенсіі - гэта новы від пенсійнага страхавання. На сёння ўдзельнікамі гэтай сістэмы з'яўляюцца ўжо больш за 12 тыс. грамадзян.
"Сумесна з дзяржаўным прадпрыемствам "Стравіта" запланавана, што ў бягучым годзе мы таксама рэалізуем гэты функцыянал. І той, хто ўдзельнічае ў гэтай сістэме накапляльнага пенсійнага страхавання, зможа праз пэўную рубрыку атрымліваць звесткі аб тым, колькі на яго імянным асабовым рахунку, адкрытым у кампаніі "Стравіта", накоплена сродкаў, якая там капіталізацыя і г.д.", - сказала кіраўнік фонду.
Адказваючы на пытанні журналістаў, яна адзначыла, што такая функцыянальная магчымасць з'явіцца ў другім паўгоддзі.
Паралельна з існуючай пенсійнай сістэмай з 1 кастрычніка ў краіне пачаў працаваць новы механізм добраахвотнага страхавання дадатковай накапляльнай пенсіі. Накапленні ў дадатковую пенсію могуць складаць ад 1 працэнта да 10 працэнтаў ад зарплаты работніка, і роўны працэнт, але не большы за 3 працэнты, накіруе яго работадавец. Пры гэтым затрачаныя сродкі работадаўца пакрывае Фонд сацыяльнай абароны насельніцтва, таму гэтыя сродкі дадатковай фінансавай нагрузкі на работаўца не нясуць.
Заключыць дагавор для накаплення "другой пенсіі" можна, звярнуўшыся або ў офіс "Стравіты", або праз асабісты кабінет карыстальніка афіцыйнага сайта гэтага дзяржпрадпрыемства. Выплаты па дагаворах страхавання, заключаных з дзяржаўнай страхавой арганізацыяй, гарантуюцца дзяржавай.-0-
