25 мая, Мінск /Кар. БЕЛТА/. Вынікі рэспубліканскага конкурсу інфармацыйных матэрыялаў на прававую тэматыку на прыз імя У.Д.Спасовіча падвялі ў Мінску, перадае карэспандэнт БЕЛТА.
Паводле слоў намесніка кіраўніка Адміністрацыі Прэзідэнта Вольгі Чупрыс, у нарматворчай дзейнасці важна ведаць, як прымаемыя дакументы будуць працаваць на практыцы, наколькі яны запатрабаваны менавіта цяпер.
"Закон і творчасць непадзельныя, права і творчасць не могуць існаваць адзін без аднаго, - адзначыла яна. - Такія творчыя конкурсы патрэбны, каб разумець, якія ёсць ідэі і думкі ў вучоных, практыкаў, якія ёсць патрэбнасці і якія праблемы пры рэалізацыі нашых прапаноў мы ўбачым у рэальным жыцці. Усе, хто займаецца навуковай творчасцю, якраз пра гэта і пішуць”.
Вольга Чупрыс звярнула асаблівую ўвагу на публікацыі маладых вучоных. "Наша моладзь поўная талентаў, вельмі здольная. І думкі, якія выказвае, - на злобу дня. Трэба да іх таксама прыслухоўвацца. Я ўсяляк падтрымліваю наш конкурс. Ён неабходны. Магчыма, варта прыдумваць і новыя фарматы, але ў цэлым гэта вельмі важнае мерапрыемства, якое праводзіцца ў краіне, - як для юрыстаў-тэарэтыкаў, так і для юрыстаў-практыкаў", - дадала яна.
Міністр юстыцыі Сяргей Хаменка ў сваю чаргу выказаў упэўненасць у тым, што конкурс стане фундаментам для прадаўжэння творчых пачынанняў.
"Выдатныя словы прагучалі на цырымоніі: мы жывём у мірнай краіне, якая развіваецца. Кіраўнік дзяржавы сказаў фразу, якая для нас усіх, грамадзян Беларусі, з'яўляецца стратэгічнай: мы павінны жыць па закону. А каб жыць па закону, трэба яго ведаць. І мерапрыемствы, якія мы праводзім у рамках конкурсу, творчыя работы (тэлевізійныя праграмы, артыкулы, відэаролікі ў інтэрнэце і інш.) накіраваны на прававую асвету грамадзян розных узростаў, прафесій, нацыянальнасцей. Галоўнае - данесці да кожнага, што такое "жыць па закону", - адзначыў Сяргей Хаменка і падзякаваў усім удзельнікам конкурсу за работу.
Ён падкрэсліў, што сёння былі заахвочаны лепшыя з лепшых. А ўсяго на конкурс паступіла больш за 100 работ па 11 намінацыях: "Суд", "Пракуратура", "Следства", "Выканаўчае вядзенне па справе", "Адвакатура", "Натарыят", "Навука і права", "Гаспадарка і права", "Медыяцыя", "Права і журналістыка", "Студэнцкая навука". У конкурсе прынялі ўдзел юрысты, журналісты, індывідуальныя аўтары, аўтарскія калектывы, работы якіх публікаваліся ў друкаваных СМІ, а таксама выйшлі ў радыёэфіры ці на тэлебачанні ў 2022 годзе.
"У будучым будзем развіваць не толькі гэтыя напрамкі. Ёсць вялікая глабальная тэма - дзеці і права, ваеннаслужачыя і права", - дадаў Сяргей Хаменка.
Конкурс накіраваны на стымуляванне публікацый, стварэнне тэлерадыёпраграм, аўтарскіх матэрыялаў на прававую тэматыку і прызначаны садзейнічаць павышэнню прававой культуры грамадзян, ролі і значэння права ў цэлым.
Галоўны прыз, заснаваны 20 гадоў таму, - статуэтка, якая ўвасабляе законнасць і літаратурны талент. Акрамя таго, некаторыя ўдзельнікі за найбольш цікавыя публікацыі і выніковую работу па папулярызацыі права адзначаны дыпломамі.
У гэтым годзе цырымонія ўзнагароджвання прайшла пад эгідай Года міру і стварэння.
Сярод узнагароджаных - аўтарскія калектывы юбілейнай кнігі, прысвечанай 100-годдзю пракуратуры, вучэбнага дапаможніка па камп'ютарнай інфармацыі ў следчай дзейнасці, манаграфій па праблемах прававога рэгулявання выканаўчага вядзення па справе, асаблівасцях процідзеяння суіцыдальным паводзінам ва ўстановах крымінальна-выканаўчай сістэмы і інш.
У намінацыі "Адвакатура" прыз атрымалі адвакаты Магілёўскай абласной калегіі адвакатаў і спецыяліст інфармацыйнай службы радыё Zефір FM за цыкл радыёперадач "За справу! За права!". У намінацыі "медыяцыя" адзначаны фестываль школьнікаў і студэнтаў "Медыяцыя будучыні", у намінацыі "Права і журналістыка" - навукова-практычны часопіс "Право.by".-0-
