26 мая, Мінск /Кар. БЕЛТА/. Пасяджэнне рабочай групы па актуалізацыі канцэпцыі супрацоўніцтва дзяржаў - удзельніц Садружнасці Незалежных Дзяржаў у галіне аховы здароўя насельніцтва прайшло 25 мая ў штаб-кватэры СНД. Аб гэтым БЕЛТА паведамілі ў прэс-службе Выканкама СНД.
У пасяджэнні ўдзельнічалі прадстаўнікі Беларусі, Азербайджана, Арменіі, Казахстана, Кыргызстана, Расіі, Таджыкістана, Туркменістана, Узбекістана і Выканаўчага камітэта Садружнасці. Разгледзеўшы заўвагі і прапановы, якія паступілі да дакумента, эксперты дапрацавалі і большасцю галасоў узгаднілі праекты змяненняў у канцэпцыю і адпаведных рашэнняў Камісіі па эканамічных пытаннях пры Эканамічным савеце СНД, Эканамічнага савета СНД і Савета кіраўнікоў урадаў СНД. Вынікі пасяджэння рабочай групы вырашана прадставіць на чарговым пасяджэнні Савета па супрацоўніцтве ў галіне аховы здароўя СНД.
Канцэпцыя супрацоўніцтва ў галіне аховы здароўя насельніцтва зацверджана кіраўнікамі ўрадаў краін Садружнасці ў 2003 годзе. Дакумент вызначае асноўныя прынцыпы, мэту, задачы і напрамкі ўзаемадзеяння дзяржаў СНД у вырашэнні праблем аховы здароўя насельніцтва. Аднак з моманту прыняцця канцэпцыі адбыліся структурныя змяненні сістэм аховы здароўя ў дзяржавах Садружнасці. У некаторых краінах практыкуецца змешаная мадэль аховы здароўя, у шэрагу краін укаранёна сістэма абавязковага медыцынскага страхавання, пашырана эканамічная самастойнасць медыцынскіх устаноў, сфарміраваны рынак медыцынскіх паслуг.
Актыўна развіваецца лічбавізацыя аховы здароўя і персаніфікаваны падыход, выкарыстоўваюцца сучасныя формы дыстанцыйнага кансультавання і тэлемедыцыны, асаблівы акцэнт зроблены на ўзаемадзеянні ў барацьбе і прафілактыцы неінфекцыйных захворванняў, туберкулёзу і ВІЧ-інфекцыі, антыбіётыкарэзістэнтнасці. Новай формай узаемадзеяння стала супрацоўніцтва ў рамках базавых арганізацый. Для захавання санітарна-эпідэмічнага дабрабыту актыўна развіваецца работа па кантролі за асабліва небяспечнымі інфекцыйнымі захворваннямі, зроблены ўпор на падрыхтоўку спецыялістаў спецыялізаваных проціэпідэмічных брыгад.
Для прывядзення норм канцэпцыі ў адпаведнасць з сучаснымі патрабаваннямі Савет па супрацоўніцтве ў галіне аховы здароўя СНД і прыняў рашэнне аб актуалізацыі дакумента.-0-
