9 жніўня, Мінск /Кар. БЕЛТА/. Беларускія ваеннаслужачыя ВПС і ППА прымуць удзел у вучэннях на тэрыторыі Беларусі і Расіі, паведамляе БЕЛТА са спасылкай на Міністэрства абароны Беларусі.
Як паведамілі ў ведамстве, у адпаведнасці з планам падрыхтоўкі Ваенна-паветраных сіл і войскаў проціпаветранай абароны па прызначэнні ў 2021-2022 навучальным годзе з 9 па 25 жніўня пад кіраўніцтвам намесніка камандуючага Ваенна-паветранымі сіламі і войскамі проціпаветранай абароны пройдзе аператыўна-тактычнае вучэнне з родамі войскаў ВПС і войскаў ППА з баявой стральбой.
Вучэнне праводзіцца на тэрыторыі Беларусі і 185-га цэнтра баявой падрыхтоўкі і баявога прымянення Паветрана-касмічных сіл Расіі, адзначылі ў Мінабароны. Само мерапрыемства баявой падрыхтоўкі пройдзе ў два этапы: 9-11 жніўня - у раёнах правядзення вучэння на тэрыторыі Беларусі, 22-25 жніўня - у межах тэрыторыі і паветранай прасторы палігона Ашулук. Перадыслакацыя ваеннаслужачых на палігон Ашулук будзе ажыццяўляцца чыгуначным і паветраным эшалонамі.
У вучэнні прыме ўдзел асабовы склад і ўзбраенне, ваенная і спецыяльная тэхніка ад авіяцыйных воінскіх часцей, войскаў проціпаветранай абароны і радыётэхнічных войскаў, а таксама баявыя разлікі Ваеннай акадэміі Рэспублікі Беларусь. Мэта вучэння - павышэнне зладжанасці злучэнняў і воінскіх часцей пры выкананні задач па прызначэнні.-0-
