25 мая, Масква /Кар. БЕЛТА/. Прэзідэнт Беларусі Аляксандр Лукашэнка на саміце ЕАЭС у Маскве заявіў аб неабходнасці "прасячы акно" ў краіны паўднёвага ўсходу. Аб гэтым кіраўнік дзяржавы заявіў на пасяджэнні Вышэйшага Еўразійскага эканамічнага савета, перадае карэспандэнт БЕЛТА.
Адным з прыярытэтных вектараў развіцця ЕАЭС Аляксандр Лукашэнка назваў удасканаленне транспартнай інфраструктуры і развіццё эфектыўнай лагістыкі. "Прэзідэнт Казахстана ў вузкім складзе ўзнімаў гэта пытанне і на прыкладах паказваў, наколькі гэта важна для развіцця нашага саюза", - адзначыў ён.
"У сувязі з разваротам нашых экспартных патокаў на паўднёвы ўсход вельмі важна сумеснымі намаганнямі "прасячы акно" ў краіны названага рэгіёна. Гэта бяздонны рынак для айчынных тавараў", - падкрэсліў беларускі лідар.
У той жа час неабходна забяспечыць роўны доступ да існуючай і ствараемай інфраструктуры, каб у далейшым не ўзнікла непрыемных сітуацый, як у выпадку з экспартам на рынкі трэціх краін лесаматэрыялаў праз тэрыторыю дзяржаў - членаў ЕАЭС. "І як Казахстан гаворыць аб каменным вугле", - дадаў Аляксандр Лукашэнка.
Прэзідэнт таксама лічыць мэтазгодным вярнуцца да разгляду пытання аб лібералізацыі аўтамабільных перавозак у трэція краіны без неабходнасці атрымання спецыяльных дазволаў.-0-
