ДЗЯРЖОРГАНЫДЗЯРЖОРГАНЫ
Флаг Серада, 10 жніўня 2022
Мінск +20°C
Усе навіны
Усе навіны
Прэзідэнт
26 красавіка 2022, 12:46

Лукашэнка: час паказаў правільнасць нашых рашэнняў аб развіцці пацярпелых рэгіёнаў

26 красавіка, Мінск /Кар. БЕЛТА/. Час паказаў правільнасць рашэнняў аб развіцці пацярпелых у выніку чарнобыльскай катастрофы рэгіёнаў. Аб гэтым Прэзідэнт Беларусі Аляксандр Лукашэнка заявіў, заслухоўваючы даклад аб выкананні даручэнняў па пераадоленні наступстваў катастрофы на Чарнобыльскай АЭС, перадае карэспандэнт БЕЛТА.

Кіраўнік дзяржавы адзначыў, што ў гадавіну чарнобыльскай трагедыі ён заўсёды наведвае пацярпелыя рэгіёны. Але на гэты раз ён вырашыў заслухаць даклады аб развіцці гэтых тэрыторый у Мінску. Прэзідэнт растлумачыў, што ўмовы надвор'я цяпер не самыя лепшыя, таму "тузаць там людзей не даводзіцца". Гэта стала асноўнай прычынай пераносу яго рабочай паездкі ў гэтыя рэгіёны.

"Мы, вядома ж, гэту праграму, якая запланавана на ўзроўні Прэзідэнта, адпрацуем, але крыху пазней, - сказаў Аляксандр Лукашэнка. - Я хацеў бы сёння, перш чым туды паехаць, атрымаць інфармацыю, як рэалізоўваюцца тыя планы, якія намі намечаны, і тыя даручэнні, якія мною дадзены ў час апошніх сустрэч з людзьмі і паездак па чарнобыльскіх рэгіёнах".

Пытаннем нумар адзін кіраўнік дзяржавы назваў сацыяльны блок. Бо, як бы паспяхова сёння ні развіваліся пацярпелыя тэрыторыі, у памяці людзей засталіся першапачатковыя праблемы, растлумачыў Прэзідэнт. "Якая сітуацыя і як вырашаюцца сацыяльныя пытанні?" - спытаў ён.

"Другое пытанне - эканоміка. Мы вельмі шмат зрабілі для жыцця людзей. Часу нямала прайшло ўжо, больш за 30 гадоў, і мы ўбачылі, што намі былі прыняты правільныя рашэнні, што мы не кінулі велізарныя тэрыторыі нашай краіны. Людзі жывуць у тых гарадах, пасёлках. Больш таго, нядрэнна працуюць, асабліва ў сельскай гаспадарцы", - падкрэсліў Аляксандр Лукашэнка.

Трэцяе пытанне - меліярацыя зямель і іх уключэнне ў сельскагаспадарчы абарот. "Пакрыху, там, дзе можна, не напружваючы абстаноўку, не заганяючы людзей на тыя землі, на якіх сёння працаваць складана", - адзначыў Прэзідэнт.

Асаблівую ўвагу кіраўнік дзяржавы звярнуў на лесааднаўленне і дрэваапрацоўку. Адпаведныя даручэнні ўжо былі дадзены ім раней.

"У тым ліку людзям вельмі цікава займацца рыбалоўствам, ажыццяўляць трафейнае паляванне. Перасцерагаючы людзей, мы гэта робім. Павінны быць захаваны меры бяспекі. Трэба гэта кантраляваць, каб не было: куды хачу - туды іду. Мы гаварылі пра экалагічны турызм, пчалярства, конегадоўлю. Як паказалі вопыт і практыка, гэтай справай там займацца можна, і гэта дае добры вынік. Гэта значыць шэраг канкрэтных праблем, якія ўзнімаліся на месцы ў час маіх паездак, быў адрасаваны канкрэтным ведамствам, канкрэтным людзям. Як гэта рэалізавана? Зроблена, не зроблена, што яшчэ нам давядзецца там зрабіць?" - пацікавіўся Прэзідэнт.

Цяпер у Беларусі рэалізуецца шостая дзяржаўная праграма па пераадоленні наступстваў катастрофы на Чарнобыльскай АЭС да 2025 года. Агульны аб'ём фінансавання па ёй складае амаль Br3 млрд. На выкананне папярэдніх пяці праграм з 1990 года было накіравана больш за $19 млрд.

За кошт сродкаў дзяржпраграмы былі прадастаўлены льготы і выплачаны кампенсацыі пацярпелым ад катастрофы грамадзянам на суму каля Br164 млн. Бясплатным харчаваннем забяспечаны больш за 110 тыс. навучэнцаў, якія атрымліваюць агульную базавую і агульную сярэднюю адукацыю і пражываюць на забруджаных радыенуклідамі тэрыторыях.

Санаторна-курортнае лячэнне і аздараўленне прайшлі 84,1 тыс. грамадзян, якія пацярпелі ад аварыі на ЧАЭС, у тым ліку 75,6 тыс. дзяцей. Для патрэб дзіцячых рэабілітацыйна-аздараўленчых цэнтраў набыта сучаснае лячэбнае абсталяванне на суму Br250 тыс.

Прадаўжаецца выкананне комплексу ахоўных мерапрыемстваў у сельскай вытворчасці. Праведзены рамонтна-эксплуатацыйныя работы на адкрытых унутрыгаспадарчых меліярацыйных сетках працягласцю 1,3 тыс. км і радыяцыйнае абследаванне сельгасзямель на плошчы 341,4 тыс. га.

Для развіцця інфраструктуры ў пацярпелых раёнах газіфікаваны 724 жылыя дамы, пракладзена 34 км газаправодных і 17,6 км вадаправодных сетак. Уведзены ў эксплуатацыю тры станцыі ачысткі вады ад прымесей жалеза і дзве артэзіянскія свідравіны. Будуюцца і рэканструююцца 4 малочнатаварныя фермы, 4 зернесушыльныя комплексы і комплекс племянной свінагадоўлі ў Добрушскім раёне.-0

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі