ДЗЯРЖОРГАНЫДЗЯРЖОРГАНЫ
Флаг Чацвер, 11 жніўня 2022
Мінск Ясна +22°C
Усе навіны
Усе навіны
Прэзідэнт
27 чэрвеня 2022, 12:39

Лукашэнка: Беларусь і Самарская вобласць маюць усе магчымасці выйсці ў гандлі на $1 млрд

У час сустрэчы
У час сустрэчы

27 чэрвеня, Мінск /Кар. БЕЛТА/. Беларусь і Самарская вобласць Расіі маюць усе магчымасці выйсці ў гандлі на паказчык $1 млрд. Аб гэтым Прэзідэнт Беларусі Аляксандр Лукашэнка заявіў на сустрэчы з губернатарам Самарскай вобласці Дзмітрыем Азаравым, перадае карэспандэнт БЕЛТА.

"Не ўдаючыся ў статыстыку, хачу сказаць: ёсць усе магчымасці выйсці ў гандлі на паказчык $1 млрд тавараабароту. Трэба ўсяго толькі выканаць да кропкі і коскі тое, аб чым мы раней дамаўляліся на розных узроўнях. Сёння само жыццё нас да гэтага падштурхоўвае і паказвае той правільны, магчыма, адзіны шлях. Трэба абапірацца на сваё", - сказаў беларускі лідар.

Паводле ацэнак беларускага боку, у 2021 годзе тавараабарот з Самарскай вобласцю склаў практычна $700 млн і павялічыўся амаль на 4 працэнты. Паказчыкі гэтага года знізіліся на 59 працэнтаў з-за скарачэння імпарту спецыфічных тавараў з Расіі. Пры гэтым беларускі экспарт паказвае добры прырост да мінулага года (больш за 20 працэнтаў). Цяпер айчынныя прадпрыемствы не толькі выконваюць свае абавязацельствы, але і значна перавышаюць аб'ёмы паставак запасных частак і камплектуючых, ліфтавага абсталявання, мэблі, прадуктаў харчавання, лякарстваў і іншых тавараў.

Аляксандр Лукашэнка заявіў аб гатоўнасці Беларусі істотна нарасціць аб'ёмы паставак самай сучаснай аўтамабільнай, сельскагаспадарчай і дарожна-будаўнічай тэхнікі.

Асобна кіраўнік дзяржавы акцэнтаваў увагу на лесанарыхтоўчай тэхніцы, вытворчасць якой апошнія гады асвойваецца ў Беларусі, але серыйная вытворчасць пакуль не наладжана. А гэта прадукцыя запатрабавана і ў Расіі. "Я Прэзідэнту (Расіі. - Заўвага БЕЛТА) гэта ўсё расклаў. Без гэтага ж мы не абыдземся, асабліва Расія. Гэта, як я сказаў, наша другая нафта (лясныя рэсурсы. - Заўвага БЕЛТА). І пад гэта сёння, каб усё гэта разгарнуць як імпартазамяшчэнне, патрэбна мінімум ад 200 да 250 мільёнаў долараў. Ён гаворыць: гэта цікавы праект, мы павінны яго вывучыць і абавязкова пашыраць. Ва ўрадах трэба цяпер каб праект гэты пайшоў. Можа, і Самарская вобласць знойдзе ў гэтым сваё месца", - расказаў кіраўнік беларускай дзяржавы.

"Упэўнены, што па ўмовах забеспячэння, сэрвіснага абслугоўвання, фінансавага суправаджэння мы можам дамовіцца. І апошнія месяцы аб гэтым сведчаць", - сказаў Прэзідэнт.

"Хоць у бягучым годзе цэны выраслі па незалежных ад нас прычынах, Беларусь практычна не знізіла тэмпы імпарту з вашай вобласці. Мы сталі закупляць больш сланечнікавага алею, меднага дроту, падшыпнікаў. Але гэта далёка не поўны пералік прадукцыі, якую мы маглі б у вас набываць. Разлічваем, што ваш візіт у Беларусь дасць магчымасць збалансаваць гандаль. Ад гэтага выйграюць усе", - адзначыў кіраўнік дзяржавы.

Вельмі важным з'яўляецца і пошук новых магчымасцей для пашырэння прамысловай кааперацыі. "Цікавасць павінна быць поўная. І рабочыя месцы павінны стварацца як у Беларусі, так і ў Самарскай вобласці", - заўважыў Аляксандр Лукашэнка.

Яшчэ адзін напрамак супрацоўніцтва - трансфер тэхналогій і экспарт паслуг. Напрыклад, беларускім спецыялістам цікавы даследаванні самарскіх вучоных і экспертаў абаронна-прамысловага комплексу. У сваю чаргу Беларусь заўсёды гатова падзяліцца назапашаным вопытам у развіцці аграрнага сектара, можа пашырыць асартымент паставак прадуктаў харчавання, удзельнічаць у праектаванні і ўзвядзенні сацыяльных і прамысловых аб'ектаў. Ёсць гатоўнасць абменьвацца навуковымі дасягненнямі і тэхналогіямі, у тым ліку напрацоўкамі ў дарожным будаўніцтве.

"Калі вы ўбачыце нашу неабходнасць удзельнічаць у Самарскай вобласці ў якіх-небудзь работах, мы будзем удзячныя вам за гэта і будзем вельмі адказна выконваць гэтыя работы. Вядома, за ўсёй эканомікай, гандлем нельга забываць і гуманітарны напрамак. У гэтым плане мы павінны ўзаемадзейнічаць. І ў галіне адукацыйных устаноў, дзеячаў культуры, работы ў інфармацыйнай сферы. Трэба, каб у Самары ведалі, чым жывуць нашы людзі, чым яны дыхаюць. І мы павінны ведаць, як развіваецца Самарская вобласць. Таму тут без СМІ не абысціся", - сказаў Прэзідэнт.

Аляксандр Лукашэнка прапанаваў у ходзе візіту губернатара разгледзець усе напрамкі супрацоўніцтва: "Вы павінны нам сказаць, што мы можам і павінны зрабіць для Самарскай вобласці. Мы да вашых паслуг. Калі трэба і мы можам падставіць недзе плячо, мы гэта гатовы зрабіць".-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі