Сцяг Аўторак, 21 мая 2024
Усе навіны
Усе навіны
Палітыка
23 красавіка 2024, 15:01

Шэстакоў расказаў аб тым, на што павінна абапірацца супрацоўніцтва Беларусі з Лацінскай Амерыкай
 

Яўген Шэстакоў. Фота з архіва
Яўген Шэстакоў. Фота з архіва
23 красавіка, Масква /Эдуард Півавар - БЕЛТА/. Супрацоўніцтва Беларусі з краінамі Лацінскай Амерыкі павінна абапірацца не толькі на гандаль гатовай прадукцыяй, але і на абмен тэхналогіямі. Такое меркаванне выказаў журналістам намеснік міністра замежных спраў Беларусі Яўген Шэстакоў 23 красавіка ў Маскве ў кулуарах III Беларуска-Лацінаамерыканскага форуму, перадае карэспандэнт БЕЛТА.

"На сённяшні дзень сусветныя рынкі дастаткова забяспечаны вялікай колькасцю гатовай прадукцыі, і для нашых лацінаамерыканскіх партнёраў рынкі Паўночнай і Цэнтральнай Амерыкі значна бліжэйшыя, больш вядомыя і прывычныя. У сувязі з гэтым пошукі элементаў канкурэнтаздольнасці прадугледжваюць дзяліцца не толькі гатовай прадукцыяй, але і тымі тэхналогіямі, якімі Беларусь традыцыйна валодае", - сказаў Яўген Шэстакоў.

Паводле яго слоў, размова ідзе перш за ўсё пра тэхналогіі ў галіне развіцця сельскай гаспадаркі. "Многія лацінаамерыканскія партнёры вельмі ў гэтым зацікаўлены, уключаючы, такія нібыта простыя рэчы, як вытворчасць бульбы, цыбулі, іншых прадуктаў, паколькі мы традыцыйна з савецкіх часоў валодаем добрымі кампетэнцыямі ў гэтай галіне", - заўважыў намеснік кіраўніка МЗС Беларусі.

Другім перспектыўным напрамкам ён назваў магчымае супрацоўніцтва ў галіне тэхналогій па зборцы беларускай машынабудаўнічай прадукцыі. "Зразумела, што гэтыя пытанні павінны мець сваю бізнес-кампаненту, яны павінны быць выгадныя абодвум бакам, а гэта дасягальна толькі пры наяўнасці пэўных аб'ёмаў рэалізацыі названай прадукцыі, таму што зборка невялікай колькасці тэхнікі, як правіла, не мае сур'ёзнага значэння, значна танней проста пастаўляць тэхніку з Беларусі", - растлумачыў Яўген Шэстакоў.

"Гэта датычыцца і супрацоўніцтва ў галіне навукі: маючы такую развітую навуковую базу, мы часам нават самі не ведаем да канца, у якіх сферах мы можам быць цікавы адзін аднаму. Таму сутнасць правядзення такіх форумаў у тым, каб дыпламатычны корпус, які акрэдытаваны як у Маскве, так і ў Беларусі па сумяшчальніцтве, мог паразмаўляць з прадстаўнікамі нашых буйнейшых экспарцёраў і тэхналагічных арганізацый", - дадаў ён.

III Беларуска-Лацінаамерыканскі форум арганізаваны Нацыянальным цэнтрам маркетынгу сумесна з МЗС Беларусі на базе Дзелавога і культурнага комплексу пасольства Беларусі ў Расіі. Беларускую дэлегацыю на ім узначаліў намеснік міністра замежных спраў Беларусі Яўген Шэстакоў. Удзельнікамі мерапрыемства сталі кіраўнікі дыпламатычных місіій і гандлёва-эканамічных службаў краін Лацінскай Амерыкі, акрэдытаваных у Расіі і ў Беларусі па сумяшчальніцтве.

На гэтым форуме Беларусь прадставіла патэнцыял лёгкай прамысловасці, фармацэўтыкі, харчовай прамысловасці, а таксама найбольш перспектыўныя праекты ў сферы біятэхналогій, вытворчасці біяпрэпаратаў для сельскай гаспадаркі і біяўгнаенняў. Адбыліся таксама выступленні профільных экспертаў па тэмах лагістыкі і ажыццяўлення ўзаемаразлікаў з контрагентамі ў краінах рэгіёна.-0-
Падпісвайцеся на нас у
Twitter
Топ-навіны
Свежыя навіны Беларусі