ДЗЯРЖОРГАНЫДЗЯРЖОРГАНЫ
Чацвер, 29 кастрычніка 2020
Мінск Воблачна з праясненнямі +10°C
Усе навіны
Усе навіны
Палітыка
24 верасня 2020, 15:52

МЗС: спробы асобных краін Захаду паставіць пад сумненне легітымнасць Прэзідэнта не адлюстроўваюць меркавання большасці міжнароднай супольнасці

Фота з архіва
Фота з архіва

24 верасня, Мінск /Кар. БЕЛТА/. Спробы асобных краін Захаду паставіць пад сумненне легітымнасць кіраўніка дзяржавы ні ў якай меры не адлюстроўваюць меркавання пераважнай большасці міжнароднай супольнасці. Аб гэтым гаворыцца ў заяве Міністэрства замежных спраў у сувязі з рэакцыяй шэрага замежных краін на інаўгурацыю Прэзідэнта Беларусі, паведамляе БЕЛТА.

У МЗС падкрэслілі, што 23 верасня ў адпаведнасці з нормамі беларускага заканадаўства адбылася інаўгурацыя Прэзідэнта Аляксандра Лукашэнкі. "Беларускі народ, які з'яўляецца адзінай крыніцай улады і носьбітам суверэнітэту, зрабіў свой выбар. Менавіта гэта мае вызначальнае значэнне. Нейкія вынайдзеныя асобнымі актарамі працэдуры знешняй легітымацыі з усіх пунктаў гледжання нязначныя, - перакананы ў МЗС. - Мы даўно з'яўляемся міжнародна прызнанай незалежнай дзяржавай і раўнапраўныя з усімі іншымі на міжнароднай арэне".

Як нагадалі ў МЗС, забарона на ўмяшанне ва ўнутраныя справы - адзін з краевугольных прынцыпаў міжнароднага права, замацаваны ў арт.2 Статута ААН. "Таму беларусы самастойна і без знешняга ўмяшання выбіраюць кіраўніка сваёй дзяржавы, парламент і мясцовыя Саветы. Беларускі народ не мае патрэбы ў "легітымізацыі" сваёй улады з боку саманазваных факультатыўных "легітыматараў", - гаворыцца ў заяве. - Гэта пытанне з'яўляецца надуманым і штучным. Спробы асобных краін Захаду паставіць пад сумненне легітымнасць кіраўніка дзяржавы ні ў якай меры не адлюстроўваюць меркавання пераважнай большасці міжнароднай супольнасці".

Асаблівае здзіўленне ў МЗС выклікаюць паводзіны ўкраінскіх суседзяў, якія "ўжо нават не спрабуюць закамуфліраваць несамастойнасць у прыняцці сваіх знешнепалітычных рашэнняў і не спыняюць паток заяў нібыта са сваімі "прагрэсіўнымі" ацэнкамі чамусьці нашай унутрыпалітычнай сітуацыі". "Складваецца адчуванне, што менавіта "навучыцца вучыць" пакуль з'яўляецца галоўным вынікам украіна-еўрапейскага супрацоўніцтва. Пры гэтым прызначаныя дагадзіць модным трэндам заявы гучаць ад прадстаўніка ўрада суседняй дзяржавы, якую Беларусь шчыра і бескарысліва падтрымлівае, заняўшы абсалютна незалежную і самастойную пазіцыю. Хоць, мяркуючы па ўсім, кіраўнік МЗС Украіны і не лічыць гэта важным для сваёй краіны. Але мы прадоўжым падтрымліваць братэрскі ўкраінскі народ", - адзначылі ў МЗС.

У знешнепалітычным ведамстве падкрэслілі, што Беларусь ніколі не ўмешвалася і не мае намеру ўмешвацца ва ўнутраныя справы іншых дзяржаў. "Чакаем ад нашых замежных партнёраў аналагічнага падыходу. Павага, раўнапраўе, улік інтарэсаў адзін аднаго - вось асноўныя прынцыпы і прыярытэты, якія знаходзяцца ў аснове нармальнага суіснавання дзяржаў у духу добрасуседства і партнёрства ў інтарэсах усіх грамадзян, - гаворыцца ў заяве. - Беларусь ніколі не імкнулася і цяпер не імкнецца да канфрантацыі. Мы за дыялог. Больш таго, мы не раз на розных узроўнях падкрэслівалі, што зацікаўлены развіваць узаемавыгаднае канструктыўнае супрацоўніцтва з усімі міжнароднымі партнёрамі".-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі