Сцяг Субота, 15 чэрвеня 2024
Усе навіны
Усе навіны
Палітыка
21 мая 2024, 14:47

Алейнік: Беларусь гатова прапанаваць ШАС свой прамысловы патэнцыял і вопыт міратворчай дзейнасці

Фота МЗС Беларусі
Фота МЗС Беларусі
21 мая, Мінск /Кар. БЕЛТА/. Беларусь гатова прапанаваць партнёрам па Шанхайскай арганізацыі супрацоўніцтва свой прамысловы патэнцыял і вопыт міратворчай дзейнасці. Аб гэтым кіраўнік знешнепалітычнага ведамства Сяргей Алейнік заявіў на пасяджэнні Савета міністраў замежных спраў дзяржаў - членаў ШАС у Астане, перадае карэспандэнт БЕЛТА.

"Беларусь паслядоўна прайшла ўсе этапы станаўлення ў ШАС: спачатку ў статусе партнёра па дыялогу, потым у статусе наглядальніка, і, нарэшце, завяршае працэдуру афармлення паўнапраўнага членства. Мы імкнёмся актыўна праяўляць сябе ва ўсіх вымярэннях работы арганізацыі: палітыка-дыпламатычным, гандлёва-эканамічным і культурна-гуманітарным. Стаўшы паўнацэннай часткай шанхайскай сям'і, Беларусь гатова прапанаваць партнёрам свой прамысловы, навуковы, транзітны патэнцыял, набыты вопыт міратворчай дзейнасці і шматбаковай дыпламатыі", - сказаў Сяргей Алейнік.

Паводле яго слоў, сярод беларускіх прыярытэтаў у ШАС - нарошчванне эфектыўнага супрацоўніцтва для ўмацавання рэгіянальнай бяспекі. "Гатовы ўносіць сваю лепту ў работу механізмаў узаемадзеяння па лініі кіраўнікоў саветаў бяспекі, міністраў абароны, Рэгіянальнай антытэрарыстычнай структуры (РАТС), удзельнічаць у станаўленні правіл і дзейнасці новых структур, аб якіх сёння ішла размова: антынаркатычны цэнтр у Таджыкістане, цэнтр па процідзеянні аргзлачыннасці ў Кыргызстане, цэнтр па інфармацыйнай бяспецы ў Казахстане, універсальны цэнтр па барацьбе з выклікамі і пагрозамі на базе РАТС", - адзначыў міністр.
"Міжнародныя арганізацыі і асобныя ваенна-палітычныя механізмы не змаглі прадухіліць фрагментацыю і дэградацыю сістэмы рэгіянальнай бяспекі, а ў выпадку з еўра-атлантычнай прасторай правакавалі іх. Для пошуку рашэнняў гэтых праблем Беларусь у кастрычніку 2023 года правяла міжнародную канферэнцыю высокага ўзроўню "Еўразійская бяспека: рэальнасць і перспектывы ў трансфармуемым свеце". Прадстаўнікі многіх краін ШАС унеслі ўклад у поспех гэтага мерапрыемства. Праведзеныя дыскусіі пацвердзілі запатрабаванасць беларускай ініцыятывы па стварэнні пляцоўкі для абмеркавання ў адкрытым і інклюзіўным рэчышчы пытанняў фарміравання справядлівай, бяспечнай і ўстойлівай архітэктуры міжнародных адносін на еўразійскай прасторы", - дадаў кіраўнік беларускага МЗС.

Абапіраючыся на паспяховыя вынікі мінулагодняй сустрэчы, Беларусь плануе правядзенне чарговай міжнароднай канферэнцыі па еўразійскай бяспецы ў Мінску ў канцы кастрычніка - пачатку лістапада гэтага года. "Упэўнены, што новая канцэпцыя бяспекі, якую падтрымлівае ШАС, заслугоўвае абмеркавання і развіцця, у тым ліку і на мінскай пляцоўцы", - заявіў Сяргей Алейнік.

"У якасці паўнапраўнага члена ШАС Беларусь разлічвае на інтэнсіфікацыю эканамічнага ўзаемадзеяння. Гатовы падключацца да праграм развіцця эканамічнага супрацоўніцтва, работы Дзелавога форуму, фарматаў нарад міністраў прамысловасці, энергетыкі, Альянсу спецыяльных эканамічных зон ШАС. Мы будзем самым актыўным чынам удзельнічаць у прапрацоўцы інвестыцыйнага фонду, Асацыяцыі інвестараў, пула тэхнапаркаў і інавацыйных кластараў, умацоўваць узаемадзеянне ў рамках Міжбанкаўскага аб'яднання, развіваць тэмы лічбавізацыі і ІКТ, узаемаразлікаў, транспартных калідораў, іншыя ініцыятывы эканамічнага плана", - падкрэсліў дыпламат.-0-
Падпісвайцеся на нас у
Twitter
Топ-навіны
Свежыя навіны Беларусі