ДЗЯРЖОРГАНЫДЗЯРЖОРГАНЫ
Флаг Панядзелак, 29 лістапада 2021
Мінск Суцэльная воблачнасць +2°C
Усе навіны
Усе навіны
Інтэрв'ю
13 снежня 2012, 17:44

 БелГПП плануе стварыць у Беларусі цэнтр міжнароднага гандлю

Беларуская гандлёва-прамысловая палата ўваходзіць у лік вядучых дзелавых супольнасцей Беларусі і з'яўляецца сувязным звяном паміж бізнесам і ўладай. Адна з асноўных задач - садзейнічанне развіццю экспарту айчынных прадпрыемстваў. Для гэтага БелГПП арганізуе дзелавыя візіты і прыём дэлегацый іншых краін, удзел прадстаўнікоў бізнес-колаў Беларусі ў розных выстаўках, міжнародныя форумы і семінары, навучанне спецыялістаў у розных галінах, у тым ліку ў сферы знешнеэканамічнай дзейнасці.

Так, у 2012 годзе палатай было праведзена больш за 400 мерапрыемстваў, у тым ліку больш за 40 дзелавых візітаў у розныя рэгіёны Расіі, каля 100 - у краіны далёкага замежжа. БелГПП упершыню ў Беларусі арганізуе Міжнародны форум дзелавой супольнасці, які пройдзе 14 снежня ў Мінску. Аб тым, якія яшчэ меры прымае палата для папулярызацыі беларускіх тавараў і паслуг на замежныя рынкі, аб актуальных задачах у рабоце і планах на будучае ў інтэрв'ю карэспандэнту БЕЛТА расказаў старшыня Беларускай гандлёва-прамысловай палаты Міхаіл Мятлікаў.

- У гэтым годзе ўпершыню ў Беларусі пройдзе Міжнародны форум дзелавой супольнасці, прысвечаны 60-годдзю палаты. На яго запрошана 250 удзельнікаў, з іх больш за 100 - замежныя госці. Прадстаўнікі гандлёва-прамысловых палат і іншых аб'яднанняў, а таксама дзелавых колаў Вялікабрытаніі, Германіі, Італіі, Казахстана, Кітая, Мексікі, Польшчы, Расіі, Сербіі, Турцыі, Узбекістана, Украіны, Эквадора і Японіі пацвердзілі ўжо свой удзел.

Першая тэма, якую плануецца разгледзець на форуме, - пераход ад рэгіянальнай інтэграцыі да сусветнага гандлю. Адбудзецца прэзентацыя Мытнага саюза замежным гасцям форуму, будзе абмяркоўвацца ўступленне Расіі ў СГА, а таксама магчымы ўплыў гэтага ўступлення на эканоміку Беларусі. Другая тэма - узаемадзеянне гандлёва-прамысловых палат, роля выставачных цэнтраў у іх дзейнасці і развіцці бізнесу. У гэты ж дзень адбудзецца чарговае пасяджэнне Кансультатыўнага савета гандлёва-прамысловых палат дзяржаў - членаў Мытнага саюза і Адзінай эканамічнай прасторы.

Невыпадкова форум праходзіць у год 60-годдзя БелГПП. Патэнцыял, набыты за дзесяцігоддзі работы, будзе прадстаўлены ў дакладах і дыскусіях нашых калег. Лічым, што форум стане дзейснай пляцоўкай для абмеркавання актуальных тэм эканамічнай інтэграцыі, будзе садзейнічаць развіццю партнёрства паміж структурамі міжнароднай бізнес-супольнасці, дасць магчымасць чарговы раз звярнуць іх увагу на патэнцыял Беларусі як перспектыўнай краіны, якая дынамічна развіваецца і якая валодае значнымі гандлёва-эканамічнымі магчымасцямі.

- Усе мерапрыемствы, што праводзяцца БелГПП, накіраваны на папулярызацыю беларускай прадукцыі, пашырэнне рынкаў збыту, умацаванне існуючых кантактаў і пошук новых партнёраў. Міхаіл Міхайлавіч, а якія падзеі 2012 года, на вашу думку, былі знакавымі для ГПП?

- Несумненна, ёсць мерапрыемствы, якія важны для Беларускай ГПП. Адно з іх - штогадовы рэспубліканскі конкурс "Лепшы экспарцёр года", які вызначае мацнейшых у розных намінацыях. Пераможцы кожны год розныя, паколькі, атрымаўшы перамогу, прадпрыемства наступныя тры гады не мае права падаваць дакументы на конкурс. Сёлета вясной урачыстая цырымонія ўзнагароджвання праходзіла ў комплексе "Мінск-Арэна". У мерапрыемстве прынялі ўдзел у тым ліку прадстаўнікі пасольстваў замежных дзяржаў, што дало магчымасць пазнаёміцца з лідарамі беларускага экспарту і пры неабходнасці адразу ж правесці перагаворы.

Нядаўна выйшаў у свет рэкламна-інфармацыйны каталог прадстаўніцкага класа "Беларускія экспарцёры". Гэта эксклюзіўны праект БелГПП, які аб'яднаў актуальную інфармацыю аб таварах і паслугах больш як 2 тыс. прадпрыемстваў-экспарцёраў Беларусі.

Улічваючы сучасны айчынны і замежны вопыт, каталог выпушчаны ў некалькіх варыянтах - на рускай і англійскай мовах, уключаючы электронную версію. Выданне плануецца распаўсюджваць праз грамадскіх прадстаўнікоў БелГПП, на міжнародных выстаўках, форумах, кантактна-кааперацыйных біржах, якія будуць праходзіць у палаце, у абласных аддзяленнях і рэгіянальных філіялах. Таксама мы плануем размясціць каталог на сайце палаты і, магчыма, на сайце Міністэрства замежных спраў Беларусі - так кожны зможа выбраць зручны для работы і карыстання варыянт каталога.

У 2012 годзе ўпершыню за час існавання Беларускай ГПП было падпісана пагадненне з Міністэрствам замежных спраў Беларусі. Дакумент прадугледжвае не толькі інфармацыйны абмен, але і шэраг важных аспектаў выгаднага для абодвух бакоў узаемадзеяння. Цяпер, складаючы план работы, напрыклад, на 2013 год, мы будзем улічваць тыя мерапрыемствы, якія будуць праходзіць па лініі МЗС.

Акрамя таго, БелГПП будзе інфармаваць супрацоўнікаў знешнепалітычнага ведамства, якіх накіроўваюць на работу ў гандлёва-эканамічныя службы беларускіх дыпмісій, расказваць аб ужо напрацаваных кантактах, праведзеных і плануемых мерапрыемствах, аб магчымых і перспектыўных напрамках супрацоўніцтва.

- У гэтым годзе Беларуская гандлёва-прамысловая палата адзначае сваё 60-годдзе. Раскажыце пра планы на наступныя 60 гадоў. Ці вы не заглядваеце так далёка?

- Гаварыць аб планах на далёкае будучае цяжка, але магу расказаць аб бліжэйшых перспектывах. Мы плануем стварыць у Беларусі цэнтр міжнароднага гандлю, які ў абавязковым парадку будзе ўключаць выставачны цэнтр, бізнес-цэнтр з кангрэс-холам, гасцініцу для размяшчэння гасцей і ўдзельнікаў праводзімых БелГПП мерапрыемстваў. Цяпер актыўна прапрацоўваецца гэта пытанне і вядуцца адпаведныя перагаворы ва ўрадзе краіны.

Лічу, што такі дзелавы цэнтр вельмі патрэбны, паколькі на гэты час у Беларусі няма выставачнай пляцоўкі, адпаведнай сучасным міжнародным стандартам. У бізнес-цэнтры, напрыклад, змогуць размясціцца прадстаўніцтвы вядучых айчынных кампаній, банкаў, адкрытых акцыянерных таварыстваў, такіх як "Беларуская ўніверсальная таварная біржа", "Прамагралізінг", страхавая кампанія "Белэксімгарант", а таксама Беларуская гандлёва-прамысловая палата і Міжнародны арбітражны суд пры БелГПП. Такім чынам, прадстаўнікі бізнесу змогуць працаваць па прынцыпу "аднаго акна", паколькі ў адным цэнтры будуць сканцэнтраваны ўсе неабходныя паслугі: ад кансультавання па вядзенню бізнесу ў Беларусі да афармлення і суправаджэння кантрактаў.

Цэнтр міжнароднага гандлю можа стаць своеасаблівым бізнес-інкубатарам для тых, хто жадае пачаць свой бізнес і незаменным памочнікам для ўжо дзеючых бізнесменаў. Для распрацоўкі канцэпцыі цэнтра мы вывучылі вопыт іншых краін і ў бліжэйшы час актыўна будзем працаваць над рэалізацыяй гэтага праекта.

Акрамя таго, будзе прадоўжана работа над паляпшэннем якасці прапанаваных кліентам паслуг, будуць развівацца новыя напрамкі дзейнасці. Пасля стварэння Мытнага саюза сертыфікацыя па паходжанню тавараў, якая ажыццяўлялася палатай, перастала быць актуальнай - цяпер унутры МС прадукцыя можа перамяшчацца без суправаджальных дакументаў. А паколькі асноўным рынкам збыту беларускай прадукцыі з'яўляецца Расія і каля 50 працэнтаў экспарту прыпадае менавіта на гэту краіну, можна ацаніць, наколькі знізіліся аб'ёмы выдаваемых палатай дакументаў. Таму мы стараемся знаходзіць і прапаноўваць новыя віды паслуг, для чаго пастаянна праводзім анкетаванне і апытанне нашых членаў. Так, БелГПП увяла новую паслугу - ацэнку абсталявання або нерухомай маёмасці, а таксама пачала падрыхтоўку спецыялістаў, якія займаюцца ацэнкай бізнесу.

- Гандлёва-прамысловая палата цесна супрацоўнічае з дзяржаўнымі органамі. Якія сумесныя праекты вы лічыце самымі ўдалымі?

- Не так даўно адбыўся візіт прэм'ер-міністра Беларусі Міхаіла Мясніковіча ў Казахстан, Бангладэш і Індыю, у час якога БелГПП сумесна з партнёрскімі арганізацыямі ў гэтых краінах арганізавала бізнес-форумы, прэзентацыі і кантактна-кааперацыйныя біржы. Мы не толькі правялі карысныя, плённыя перагаворы, але і расказалі пра Беларусь, аб вядзенні бізнесу і аб інвестыцыйнай прывабнасці нашай краіны.

Другі напрамак узаемадзеяння - гэта супрацоўніцтва БелГПП з Міністэрствам гандлю Беларусі па правядзенню нацыянальных выставак за мяжой або арганізацыі экспазіцый на міжнародных універсальных і спецыялізаваных выстаўках. У гэтым годзе выставачнае прадпрыемства "Белінтэрэкспа" арганізавала нацыянальную экспазіцыю на міжнароднай універсальнай выстаўцы ў кітайскім горадзе Харбін. Аналагічнае мерапрыемства прайшло і ў Індыі ў Нью-Дэлі, дзе беларускі павільён заняў першае месца ў катэгорыі лепшых павільёнаў сярод замежных краін. У экспазіцыі была прадстаўлена прадукцыя, узоры і навукова-тэхнічныя распрацоўкі 60 прамысловых прадпрыемстваў і навуковых арганізацый Беларусі.

Палата таксама ўдзельнічае ў распрацоўцы нарматыўна-прававых актаў і займаецца растлумачальнай работай па іх практычнаму прымяненню. Каб вывучыць меркаванне бізнесу адносна тых ці іншых змяненняў, змешчаных у дакументах, спачатку мы рассылаем праект якога-небудзь нарматыўна-прававога акта членам палаты. Затым на базе Цэнтра дзелавой адукацыі праводзім семінары па растлумачэнню прынятых нарматыўных дакументаў. На навучальныя мерапрыемствы запрашаюцца вядучыя спецыялісты і эксперты з адпаведных міністэрстваў. Прычым такія заняткі праходзяць не толькі ў сталіцы, але таксама ў абласных аддзяленнях і філіялах палаты.

- Вы часта па абавязку службы бываеце за мяжой. Што вам здаецца цікавым у іншых краінах? І як замежныя партнёры ставяцца да Беларусі, якой прадукцыяй цікавяцца, як ацэньваюць інвестыцыйную прывабнасць нашай краіны?

- Сапраўды, я бываю ў многіх краінах свету, але, на жаль, з іх выдатнымі мясцінамі азнаёміцца не ўдаецца, бо з-за шчыльнага графіка перагавораў і сціслых тэрмінаў візітаў, акрамя аэрапорта, атэля і месца правядзення дзелавых сустрэч, нідзе не паспяваю пабываць.

Калі гаварыць аб меркаванні замежных партнёраў аб нашай краіне, хачу адзначыць, што пра Беларусь вядома няшмат. Краіны-суседзі - Расія, Украіна, Літва і Латвія - добра ведаюць нашу рэспубліку, паколькі гэтыя дзяржавы - таксама выхадцы з Савецкага Саюза. А вось М'янма, В'етнам, Новая Зеландыя, Аўстралія прымаюць нас за экзатычную краіну, таму што ў іх практычна адсутнічаюць звесткі пра Беларусь. Для іх мы госці з іншага кантынента. Але так быць не павінна, таму трэба больш расказваць аб беларускай зямлі. Для гэтага на мерапрыемствах Беларуская ГПП дэманструе прэзентацыйны фільм пра Беларусь, прадастаўляе падрабязную інфармацыю, пачынаючы ад геаграфічнага становішча і кліматычных асаблівасцей і заканчваючы эканамічным патэнцыялам і інвестыцыйным кліматам.

У многіх краінах ведаюць тэхніку флагманаў беларускага машынабудавання, аднак трэба папулярызаваць і прэзентаваць іншыя тавары, паколькі ў Беларусі добрай якасці выпускаецца не толькі машынабудаўнічая прадукцыя. Напрыклад, Новая Зеландыя, якая займае лідзіруючыя пазіцыі ў свеце па вытворчасці малака, высока ацэньвае якасць беларускай малочнай прадукцыі і бачыць у нас сур'ёзнага канкурэнта.

Таму калі мы хочам дэманстраваць інвестыцыйную прывабнасць нашай краіны, неабходна больш расказваць аб Беларусі, яе інвестыцыйным клімаце і тых праектах, якія мы можам прапанаваць патэнцыяльным інвестарам. А для гэтага трэба пастаянна трымаць руку на пульсе і добра разбірацца ў гэтай цікавай і глыбокай тэме.

- Калі не сакрэт, што вы звычайна дорыце калегам у замежных камандзіроўках?

- У першую чаргу, у якасці падарунка мы вязём беларускі лён, які вядомы ва ўсім свеце. Таксама стараемся ўзяць з сабой вырабы са шкла і хрусталю, аднак давезці іх часам бывае вельмі праблематычна. Вядома ж, прэзентуем сімвал Беларускай гандлёва-прамысловай палаты - статуэтку бога гандлю Меркурыя. Часта па просьбе замежных калег я прывожу чорны хлеб, яго нестандартныя для замежных грамадзян смакавыя якасці незвычайныя і тым самым вельмі прывабныя.

Кацярына МАРКОВІЧ
Топ-навіны
З НАМІ НАЙБОЛЬШ ЦІКАВА
Свежыя навіны Беларусі