6 чэрвеня, Мінск /Кар. БЕЛТА/. Узаемны гандаль у сферы сельскай гаспадаркі паміж Беларуссю і Расіяй за першы квартал вырас на 25 працэнтаў. Аб гэтым на палях міжнароднай спецыялізаванай выстаўкі "Белагра-2023" заявіў намеснік міністра сельскай гаспадаркі Расійскай Федэрацыі Іван Лебедзеў, перадае карэспандэнт БЕЛТА.
"Паміж Беларуссю і Расіяй сфарміравана правільная партнёрская палітыка. Сёння аб гэтым гавораць лічбы ўзаемнага гандлю. Так, у 2022 годзе дасягнуты рэкордныя паказчыкі па колькасці пастаўляемай прадукцыі і грашовым эквіваленце. Мы ўжо фіксуем дынаміку і рост, таму ў цэлым па году чакаем добрых паказчыкаў. Так, за першы квартал бягучага года прырост па ўзаемным гандлі паміж Беларуссю і Расіяй у галіне сельскай гаспадаркі склаў 25 працэнтаў адносна аналагічнага перыяду мінулага года. Мы працуем і глядзім на ўсе напрамкі сумесна. Упэўнены, разам мы дасягнём яшчэ большых вынікаў", - сказаў Іван Лебедзеў.
Ён дадаў, што Расія зацікаўлена ў супрацоўніцтве з Беларуссю па мясной і малочнай прадукцыі. "Ёсць вялікія перспектывы ў сферы лічбавізацыі сельскай гаспадаркі на тэрыторыі дзвюх нашых краін. Гэта дасць магчымасць правільна планаваць працэс уборачнай кампаніі і сяўбы, а таксама скласці тэхналагічныя карты, структуру севазвароту і іншае. Гэта вельмі шматабяцальныя планы, якія дадуць магчымасць зменшыць расходы ў структуры сабекошту і пры гэтым больш зарабляць нашым аграрыям. Упэўнены, на працягу наступных 2-3 гадоў будзем мець яскравыя вынікі ў гэтай галіне", - сказаў на заканчэнне намеснік міністра сельскай гаспадаркі Расійскай Федэрацыі.
Міжнародная спецыялізаваная выстаўка "Белагра-2023" праходзіць з 6 па 11 чэрвеня на базе выставачнага цэнтра Кітайска-беларускага індустрыяльнага парка "Вялікі камень". На выстаўцы можна азнаёміцца з перадавымі напрамкамі ў развіцці раслінаводства, жывёлагадоўлі і птушкагадоўлі, сучаснымі тэхналогіямі перапрацоўкі, упакоўкі і захоўвання прадукцыі, а таксама разнастайнасцю сельгастэхнікі. Аграрны форум традыцыйна збірае разам не толькі беларускіх аграрыяў і работнікаў харчовай і перапрацоўчай прамысловасці, але і іх замежных калег і партнёраў. У бягучым годзе ўдзел прымаюць 450 кампаній з Беларусі, Расіі, Кітая, Пакістана, Турцыі, В'етнама, Германіі, Італіі, Індыі, Палесціны. У ходзе дзелавой праграмы прадугледжана каля 20 тэматычных канферэнцый і семінараў.-0-
