17 лютага, Мінск /Кар. БЕЛТА/. Экспертны савет па пытаннях цэнаўтварэння будзе створаны пры Міністэрстве антыманапольнага рэгулявання і гандлю. Аб гэтым заявіў журналістам першы намеснік прэм'ер-міністра Мікалай Снапкоў па выніках рабочай сустрэчы з суб'ектамі гаспадарання па пытаннях цэнаўтварэння, перадае карэспандэнт БЕЛТА.
"Размова адбылася. Мы вызначылі, што неабходна стварыць пад кіраўніцтвам міністра антыманапольнага рэгулявання і гандлю экспертны савет, які, хутчэй за ўсё, будзе мяняцца ў залежнасці ад узнікаючых пытанняў. Але ў цэлым 12-15 чалавек з розных сфер там будуць пастаянна ўдзельнічаць", - сказаў Мікалай Снапкоў.
Паводле яго слоў, у хуткім часе будзе вызначаны рэгламент работы гэтага экспертнага савета. "Я таксама непасрэдна буду ўдзельнічаць у гэтай сістэме прыняцця рашэнняў. Па-першае, будзем адпрацоўваць характар рэалізацыі пастановы нумар 713, наколькі эфектыўна яна працуе на месцах, гэта значыць у рэгіёнах. Другі момант - будзем адпрацоўваць новыя прапановы і падыходы", - звярнуў увагу першы намеснік прэм'ер-міністра.
Мікалай Снапкоў адзначыў, што вельмі важна ўзаемадзеянне бізнесу і дзяржаўных органаў кіравання. "Гэты сімбіёз у дасягненні справядлівай цаны, па вялікім рахунку, і з'яўляецца нашай мэтай. Каб усё было не рэгулятарна, а на ўзаемавыгадных умовах, ва ўзаемадзеянні. І тады ўсе будуць зацікаўлены ў адным - каб на паліцы была справядлівая цана, якая дае магчымасць развівацца і фарміраваць разумны, не спекуляцыйны кошт", - паведаміў першы віцэ-прэм'ер.
Ён не выключыў, што такія сустрэчы з суб'ектамі гаспадарання будуць праводзіцца і ў далейшым. "На іх будуць прадстаўлены ўсе - ад буйнейшых вытворцаў да імпарцёраў, розніцы", - дадаў першы намеснік прэм'ер-міністра.
Таксама Мікалай Снапкоў расказаў, што прадстаўнікі гандлёвых сетак хочуць увайсці ў склад экспертнага савета. "Усе хочуць удзельнічаць, хочуць, каб іх пачулі. У цэлым падрыхтоўку пастаноў нумар 713 і 713(2) мы адпрацоўвалі разам. Мы чулі адзін аднаго. Гэта самае галоўнае, таму што калі ёсць нацэленасць на адзіны вынік і гатоўнасць слухаць праблемы адзін аднаго, усё адбываецца ў дружалюбным і канструктыўным ключы. Вынік адзін - гэта фарміраванне справядлівага кошту тавару на паліцы для нашых грамадзян", - рэзюмаваў ён.-0-
