28 снежня, Гомель /Кар. БЕЛТА/. Прадпрыемствы Гомельскай вобласці плануюць падысці па выпуску імпартазамяшчальнай прадукцыі да адзнакі $1 млрд у 2023 годзе, паведаміў 27 снежня намеснік старшыні аблвыканкама Андрэй Канюшка на сумесным пасяджэнні аблвыканкама і сесіі абласнога Савета дэпутатаў, перадае карэспандэнт БЕЛТА.
Паводле слоў Андрэя Канюшкі, у гэтым годзе ў імпартазамяшчэнні ўдзельнічалі 73 арганізацыі. "Па выніках 9 месяцаў выраблена імпартазамяшчальнай прадукцыі на суму $670 млн. Прагназуецца, што па выніках года будзе больш як $830 млн. На наступны год спыняцца не збіраемся. І ставім перад сабой задачу, каб у 2023 годзе па імпартазамяшчальнай прадукцыі падысці да сумы $1 млрд", - сказаў аб выніках і планах ён.
У праграме імпартазамяшчэння будзе мінімум 96 арганізацый, дадаў намеснік старшыні аблвыканкама.
"Пачнуць рэалізоўвацца і праекты Саюзнай дзяржавы, звязаныя з імпартазамяшчэннем. З 12 праектаў, якія ўжо зацверджаны, 3 - нашых прадпрыемстваў. Гэта "Гомсельмаш", "Салеа-Гомель", "СтанкаГомель", - адзначыў Андрэй Канюшка.
"Як чакаецца, рэалізацыя праектаў прывядзе да істотнага прарыву і ў імпартазамяшчэнні, і ў павелічэнні экспартнага патэнцыялу", - дадаў ён.-0-
