ДЗЯРЖОРГАНЫДЗЯРЖОРГАНЫ
Флаг Панядзелак, 3 кастрычніка 2022
Мінск +5°C
Усе навіны
Усе навіны
Эканоміка
28 ліпеня 2022, 16:31

Поўны цыкл вытворчасці і вопытныя спецыялісты: Качанава аб формуле поспеху "Агракамбіната Сноў"

28 ліпеня, Нясвіжскі раён /Кар. БЕЛТА/. Старшыня Савета Рэспублікі Наталля Качанава наведвае сельскагаспадарчы вытворчы кааператыў "Агракамбінат Сноў", перадае карэспандэнт БЕЛТА.

"У мяне самыя лепшыя ўражанні ад наведвання агракамбіната. На жаль, я ні разу да гэтага не была на гэтым сельскагаспадарчым прадпрыемстве, хоць з кіраўніком калісьці разам працавалі як члены Савета Рэспублікі. Я шмат ведаю аб гэтым прадпрыемстве, і тое, што тут убачыла, вядома, заслугоўвае ўсялякай пахвалы: цудоўныя палі, чакаецца выдатны ўраджай. Пачалася ўборка рапсу, ёсць пазітыўныя прагнозы, што атрымаюцца добрыя цэнтнеры з гектара", - сказала Наталля Качанава.

Паводле яе назірання, у гаспадарцы ёсць усё для вырошчвання сельгаспрадукцыі, вырабу кармоў, малочных і мясных прадуктаў. "Тут поўны цыкл вытворчасці, адпаведна, у прадпрыемства высокая дабаўленая вартасць і добры фінансавы рэзультат. Не менш важна, што тут працуюць вопытныя кіраўнік і спецыялісты, яны вызначаюць тэмпы ходу ўборачнай кампаніі. Тое, што было сказана Прэзідэнтам на селектарнай нарадзе, яны прынялі як інструкцыю да дзеяння. Трэба захаваць ураджай да зярнятка, гэта вельмі важна ў цяперашніх умовах, калі ў свеце такія праблемы з прадуктамі харчавання, - канстатавала спікер. - Я па-добраму радуюся таму, што ў нас такая сельская гаспадарка ў краіне. Вельмі мудра было прынята рашэнне кіраўніком дзяржавы пабудаваць гэты малочнатаварны комплекс, сёння гэта дае цудоўныя вынікі. Акрамя таго, прадпрыемства пастаўляе якасныя прадукты харчавання ў Мінск".

"Вельмі важна, што тут працуюць маладыя спецыялісты. Моладзь прыязджае сюды, застаецца, нягледзячы на тое, што гэта гарадскія жыхары. Тут створаны ўсе ўмовы, каб жыць, працаваць, ствараць сем'і, гадаваць дзяцей: школы, дашкольныя ўстановы, Дом культуры, спартыўныя комплексы", - дадала Наталля Качанава.

Загадчыца малочнатаварнага комплексу СВК "Агракамбінат Сноў" Настасся Роўда скончыла восем гадоў таму зоаінжынерны факультэт Беларускай дзяржаўнай сельскагаспадарчай акадэміі, пасля чаго па размеркаванні трапіла сюды. На цяперашняй пасадзе ўжо шэсць гадоў. "Нашу работу ацанілі, таму засталася тут, хоць сама родам з Віцебска. Кіраўніцтва агракамбіната нас вельмі падтрымлівае ў любых пачынаннях, таму кіраваць комплексам нескладана. Мне падабаецца працаваць у сельскай гаспадарцы: прырода, паветра, жывёлы. Ні за што не прамяняла б сваю справу на офісную работу з перакладваннем папер. Я ў пастаянным руху: закладка кармоў, работа энерганасычанай тэхнікі. Асабліва прыемна, калі растуць удоі, калі хаця б на літр падымаецца малако, для нас гэта вялікае шчасце, - падзялілася яна. - Мы стараемся ісці ў нагу з навукай, таму ўсе новаўвядзенні, якія бачым, тут жа прымяняем. І гэта пачынаецца з тэхналогій і дробязей - ад замешвання кармоў і заканчваючы подсцілам. Але няма мяжы дасканаласці, трэба ісці наперад і прыбаўляць".

"Наша гаспадарка вырабляе вялікую колькасць прадукцыі. За мінулы год мы вырабілі 29,5 тыс. т мяса і 31,5 тыс. т малака. За суткі вырабляем каля 35 т гатовай прадукцыі і рэалізуем часткова па фірменнай сетцы і па іншых магазінах нашай краіны, у тым ліку на рынкі іншых краін, такім чынам зарабляем нашай краіне валюту, - расказаў намеснік старшыні праўлення СВК "Агракамбінат Сноў" Уладзімір Мітронь. - Усяго ў нас задзейнічана ў гэтай уборачнай 18 збожжаўборачных камбайнаў. Азімы рапс пасеяны на плошчы 1050 га. Чатыры камбайны ўбіраюць збожжавыя каласавыя, астатнія з сённяшняга дня пачалі ўбіраць рапс".

Як адзначыў галоўны аграном СВК "Сноў" Аляксандр Шаманаў, ужо сабраны азімы ячмень. "Убіраем азімую пшаніцу, пачалі ўборку азімага рапсу. У гэтым годзе з улікам умоў надвор'я ўраджайнасць чакаецца вышэйшай за мінулагоднюю, - дадаў ён. - Поспехі нашага агракамбіната вызначаюцца дысцыплінай. Усё павінна быць зроблена ў агратэхнічныя тэрміны, нельга дапусціць ніякіх адступленняў. Каб атрымаць добры ўраджай, трэба выканаць усе тэхналогіі".

Сельскагаспадарчы вытворчы кааператыў "Агракамбінат Сноў" - правапераемнік КСП Агракамбінат "Сноў", створанага ў 1996 годзе на базе калгаса імя Калініна. Калгас імя Калініна ўтвораны ў 1951 годзе шляхам аб'яднання шасці бліжэйшых адзін да аднаго калгасаў. Сёння гэта буйная шматгаліновая гаспадарка з развітой перапрацоўкай і ўласнай гандлёвай сеткай. Агракамбінат вырабляе больш за трэць усёй сельгаспрадукцыі раёна, тавараабарот арганізацыі складае пятую частку раённага.

Агульная зямельная плошча на пачатак 2022 года складае больш за 9,5 тыс. га. Найбольшую ўдзельную вагу пасяўных плошчаў займае збожжавая група - 49,6 працэнта, цукровыя буракі - 3,9 працэнта, кукуруза на корм - 25,2 працэнта, шматгадовыя травы - 7,3 працэнта, бульба - 1,3 працэнта, рапс - 12,7 працэнта. У раслінаводстве гаспадарка спецыялізуецца на вырошчванні збожжавых і кармавых культур, алейнага семя рапсу, бульбы і цукровых буракоў. Астатнія плошчы заняты кармавымі культурамі. Жывёлагадоўля арыентавана на вытворчасць малака, мяса свіней, птушкі, буйной рагатай жывёлы.

Вытворчая структура прадпрыемства ўключае ў сябе шэсць паляводчых брыгад, восем ферм буйной рагатай жывёлы, свінагадоўчы комплекс, птушкаферму, мясаперапрацоўчую вытворчасць, цэхі па перапрацоўцы малака, вытворчасці камбікармоў і кіслароду, мяса-касцявой мукі, рамонтныя майстэрні, машынны двор, будаўнічы ўчастак. Уся прадукцыя жывёлагадоўлі запатрабавана ўласнай перапрацоўчай галіной агракамбіната, развіта сетка фірменнага гандлю. У гандлі агракамбіната занята 342 чалавекі. Сярэдняспісачная колькасць работнікаў за студзень - чэрвень гэтага года склала 1831 чалавек.

Вялікая ўвага ўдзяляецца развіццю сацыяльнай інфраструктуры: на балансе СВК "Агракамбінат Сноў" знаходзяцца і працуюць дом быту, лазнева-пральны камбінат, закрыты плавальны басейн, тры лазні, Дом культуры, дзве гасцініцы, два спартыўна-аздараўленчыя цэнтры, кафэ, міні-рынак, забаўляльны цэнтр для дзяцей.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі