4 красавіка, Масква /Эдуард Півавар - БЕЛТА/. Пагадненне аб прымяненні ў Еўразійскім эканамічным саюзе навігацыйных пломбаў для сачэння за перавозкамі ўступіла ў сілу з 3 красавіка, паведамілі БЕЛТА ў прэс-службе Еўразійскай эканамічнай камісіі.
Дакумент быў падпісаны кіраўнікамі дзяржаў ЕАЭС 19 красавіка 2022 года ў Маскве. "Неабходныя для ўступлення пагаднення ў сілу ўнутрыдзяржаўныя працэдуры выкананы ва ўсіх дзяржавах саюза, аб чым у ЕЭК паступілі адпаведныя ноты", - сказалі ў прэс-службе.
Дакумент мае статус міжнароднага дагавора і ўстанаўлівае прававую аснову для прымянення ў ЕАЭС новага тэхналагічнага інструмента кантролю пры перавозках тавараў і транспартных сродкаў - навігацыйных пломбаў. "Пры гэтым сфера дзеяння Пагаднення распаўсюджваецца выключна на перавозкі, якія ажыццяўляюцца па тэрыторыях дзвюх і больш краін саюза, - адзначылі ў ЕЭК. - Навігацыйная пломба з'яўляецца ўстройствам, з дапамогай якога дыстанцыйна забяспечваецца кантроль за перамяшчэннем тавараў і транспартных сродкаў. Выкарыстанне названай тэхналогіі дае магчымасць на адлегласці соцень і тысяч кіламетраў у анлайн-рэжыме назіраць за транспартным сродкам і фіксаваць кожнае незаконнае дзеянне з таварамі, якія знаходзяцца ў апламбаваным грузавым адсеку, калі яны будуць мець месца. За кошт прымянення навігацыйных пломбаў забяспечваецца празрыстасць перавозак".
Пагадненне накіравана на мінімізацыю мер дзяржаўнага кантролю пры перавозках тавараў (пры транзіце, экспарце і ў рамках узаемнага гандлю) і забеспячэнне іх законнага абароту на тэрыторыі ЕАЭС. Пагадненнем прадугледжана паэтапнае ўвядзенне сачэння з улікам катэгорый тавараў і відаў транспарту, якімі яны будуць перамяшчацца. Такі падыход забяспечыць мяккую адаптацыю ўдзельнікаў перавозак і дзяржаўных органаў да новых умоў работы, якія адпавядаюць сучасным патрабаванням.
"Сённяшнія рэаліі сведчаць аб тым, што новы сучасны інструмент кантролю адпавядае інтарэсам як кантралюючых органаў, так і суб'ектаў знешнеэканамічнай дзейнасці", - падкрэслілі ў ЕЭК.
"7 сакавіка гэтага года Калегія ЕЭК адобрыла план мерапрыемстваў па ўкараненні ў краінах Еўразійскага эканамічнага саюза механізма сачэння за перавозкамі з выкарыстаннем навігацыйных пломбаў, вызначанага Пагадненнем аб прымяненні ў ЕАЭС навігацыйных пломбаў для сачэння за перавозкамі. Адпаведная дарожная карта, якую павінен таксама зацвердзіць Савет ЕЭК на ўзроўні віцэ-прэм'ераў краін еўразійскай "пяцёркі", змяшчае комплекс мерапрыемстваў. Іх рэалізацыя дасць магчымасць пачаць сачэнне за перавозкамі ў краінах ЕАЭС у студзені 2024 года", - дадалі ў прэс-службе.-0-
