21 лютага, Масква /Эдуард Півавар - БЕЛТА/. Кіраўскую вобласць Расіі цікавяць дасягненні беларусаў, яна гатова ствараць з беларускімі партнёрамі сумесныя прадпрыемствы. Аб гэтым заявіў журналістам губернатар Кіраўскай вобласці Аляксандр Сакалоў па выніках праведзеных 20 лютага ў Маскве перагавораў з паслом Беларусі ў Расіі Дзмітрыем Крутым і старшынёй Гомельскага аблвыканкама Іванам Крупко, паведамляе карэспандэнт БЕЛТА.
"Беларускі і расійскі народы брацкія, яны аднолькава разумеюць, што такое добра і што такое дрэнна, цэняць і любяць сваю гісторыю, аднолькава бачаць сваю будучыню як незалежных, суверэнных краін, якія маюць права на ўласны выбар", - сказаў Аляксандр Сакалоў.
На яго думку, заходнія санкцыі адносна Беларусі і Расіі даюць толькі адваротны эфект. "Калі на нас спрабавалі націскаць усю нашу гісторыю, тады мы стваралі новыя дасягненні, рабілі прарывы ў космасе. Спадзяюся, што патэнцыял Беларусі і Расіі разам дасць новы прыбавачны прадукт", - падкрэсліў губернатар.
Ён таксама паведаміў, што Кіраўскую вобласць у развіцці супрацоўніцтва цікавіць перш за ўсё вялікі патэнцыял Беларусі ў сферы машынабудавання, тэхналогіі ў жывёлагадоўлі, агародніцтва. "Мы гатовы ісці на сумесныя намаганні і стварэнне сумесных прадпрыемстваў", - запэўніў Аляксандр Сакалоў.
"Мы ведаем беларусаў як вельмі добрасумленных, акуратных і добрых будаўнікоў, а ў нас вялікі фронт будаўнічых работ і мы гатовы запрасіць беларускія кампаніі да сумеснай работы на тэрыторыі Кіраўскай вобласці", - заявіў ён.
"У нас вельмі добры навуковы і адукацыйны патэнцыял, думаю, што нашы ўніверсітэты з задавальненнем прынялі б беларускіх студэнтаў і сумесна з беларускімі калегамі мы гатовы ствараць новыя прадукты ў галіне навукі. Нас цікавяць дасягненні беларусаў у электроніцы, хіміі. У нас таксама ёсць свае дасягненні ў хіміі і машынабудаванні, і гэта якраз той выпадак, калі два плюс два будзе больш чым чатыры", - сказаў на заканчэнне губернатар Кіраўскай вобласці.-0-
