31 кастрычніка, Мінск /Кар. БЕЛТА/. Больш буйныя суб'екты бізнесу, вытворчасці, гандлю поўнасцю ўжо адаптаваліся пад новыя правілы цэнавага рэгулявання і спакойна па іх працуюць. Больш дробны сегмент павольней уваходзіць у сітуацыю. Аб гэтым заявіў журналістам прэм'ер-міністр Раман Галоўчанка пасля даклада Прэзідэнту Беларусі Аляксандру Лукашэнку, перадае карэспандэнт БЕЛТА.
Паводле яго слоў, бізнесу, вытворцам гандлю спатрэбіўся некаторы час, каб унікнуць у змяненні і перабудаваць сваю работу. "На першым этапе было пэўнае ўзрушэнне, хваляванне, як і што. Гэта нармальныя эмацыянальныя рэакцыі", - заўважыў Раман Галоўчанка. Урад, паводле яго слоў, рэгулярна маніторыць сітуацыю, у тым ліку на месцах. "Мы бачым, што там, дзе буйныя суб'екты (вытворчасць, гандаль), яны поўнасцю ўжо адаптаваліся і прыстасаваліся пад новыя правілы, ужо спакойна па іх працуюць. Больш дробны сегмент павольней уваходзіць у сітуацыю", - сказаў прэм'ер-міністр. На яго думку, гэта тлумачыцца навізной сітуацыі для ўсіх. Многім цяжка змірыцца, што больш не атрымаецца накручваць на тавар па 100-200 працэнтаў. "Рэальны сектар эканомікі, у тым ліку прыватная вытворчасць, жыве з рэнтабельнасцю 7-10 працэнтаў і лічыць гэта нармальным, 15 працэнтаў - гэта, як гаворыцца, за шчасце. Думаю, прадпрымальнікі, гандаль, вытворцы будуць узмоцнена працаваць над затратамі. Гэта вельмі важны складнік фарміравання сабекошту і адпаведна цаны", - падкрэсліў Раман Галоўчанка.
"Упэўнены, што гэты шлях мы пройдзем хутка і ўпэўнена", - дадаў ён.
Разам з тым ён звярнуў увагу, што прынятыя рашэнні не з'яўляюцца догмай і зусім не значаць, што так будзе заўсёды: "Цяпер дзейнічае такі рэжым і мы будзем вучыцца ў ім жыць. Лічу, што гэты крок з аднаго боку вымушаны, а з другога - правільны".-0-
