4 лістапада, Мінск /Кар. БЕЛТА/. У Беларусі ў студзені - кастрычніку фізічныя асобы прадалі замежнай валюты на $267,4 млн больш, чым купілі. Аб гэтым сведчаць статыстычныя даныя Нацыянальнага банка, паведамляе БЕЛТА.
Агульны аб'ём купленай фізічнымі асобамі наяўнай і безнаяўнай замежнай валюты ў студзені - кастрычніку склаў $8,113 млрд, прададзенай - $8,380 млрд. Пры гэтым у кастрычніку насельніцтва сфарміравала чысты попыт на замежную валюту ў суме $116,6 млн.
Суб'екты гаспадарання - рэзідэнты Беларусі ў студзені - кастрычніку выступалі ў ролі чыстых пакупнікоў замежнай валюты. Зыходзячы з даных Нацыянальнага банка, прадпрыемствы купілі на $902 млн валюты ў эквіваленце больш, чым прадалі. Агульны аб'ём купленай юрыдычнымі асобамі замежнай валюты ў студзені - кастрычніку склаў $22,295 млрд, прададзенай - $21,393 млрд.
За кастрычнік продаж юрыдычнымі асобамі замежнай валюты перавысіў яе куплю на $102,8 млн.-0-
