31 кастрычніка, Мінск /Кар. БЕЛТА/. Беларускія аграрыі намалацілі 1 млн т зерня кукурузы. Аб гэтым карэспандэнту БЕЛТА паведамілі ў Міністэрстве сельскай гаспадаркі і харчавання.
На раніцу, 31 кастрычніка, збожжавыя і зернебабовыя культуры (з кукурузай) у Беларусі ўбраны на 2,283 млн га, што складае 95,4 працэнта ад плана. У Брэсцкай вобласці ўбрана 98,4 працэнта плошчаў (392,9 тыс. га), Віцебскай - 99,6 працэнта (356,6 тыс. га), Гомельскай - 93,8 працэнта (375,8 тыс. га), Гродзенскай - 96 працэнтаў (339,9 тыс. га), Мінскай - 94,8 працэнта (497,3 тыс. га), Магілёўскай - 90,1 працэнта (351,1 тыс. га). Усяго ў сельгасарганізацыях і фермерскіх гаспадарках намалочана 9,018 млн т збожжа.
Кукурузу на зерне ў Беларусі ўбралі са 145 тыс. га (56,4 працэнта), намалацілі 1,003 млн т пры сярэдняй ураджайнасці 70,1 ц/га. Кукурузу на сілас і зялёны корм убралі з 917,5 тыс. га, або 94,4 працэнта ад запланаванай плошчы.
"На гэты момант у Беларусі намалочана амаль 10 млн т зерня з улікам кукурузы, а таксама рапсу са свірэпіцай. Апошніх намалочана 934 тыс. т", - растлумачыў начальнік упраўлення раслінаводства Міністэрства сельскай гаспадаркі і харчавання Васіль Ядлоўскі.
Цукровыя буракі ўбраны на плошчы 74,2 тыс. га, што складае 79,4 працэнта да плана. Бульбу ўбралі з 25,6 тыс. га плошчаў, або 98,6 працэнта ад запланаванага. Іншая агародніна ўбрана з 5,15 тыс. га плошчаў - гэта 76,4 працэнта ад плана.-0-
