12 мая, Мінск /Кар. БЕЛТА/. Беларусь уводзіць часовае ліцэнзаванне імпарту асобных відаў тавараў з драўніны. Адпаведная пастанова Савета Міністраў нумар 300 ад 10 мая 2023 года апублікавана на Нацыянальным прававым інтэрнэт-партале, паведамляе БЕЛТА.
У пераліку тавараў, адносна якіх уводзіцца часовае ліцэнзаванне ўвозу ў Беларусь, - пліты драўнянастружкавыя і пліты з арыентаванай стружкай (OSB), драўнянавалакністыя пліты, а таксама шматслойныя папера і кардон з усімі беленымі слаямі.
Адзначаецца, што такая мера будзе дзейнічаць на працягу шасці месяцаў пасля афіцыйнага апублікавання пастановы.
Як адзначана ў дакуменце, увоз пералічаных тавараў будзе магчымы па разавых ліцэнзіях, выдадзеных МАРГ па ўзгадненні з канцэрнам "Беллеспаперапрам" у парадку, аналагічным устаноўленаму Правіламі выдачы ліцэнзій і дазволаў на экспарт і (або) імпарт тавараў, прадугледжанымі дадаткам да Пратакола аб мерах нетарыфнага рэгулявання ў адносінах да трэціх краін (дадатак нумар 7 да Дагавора аб Еўразійскім эканамічным саюзе ад 29 мая 2014 года).
Разам з тым дзеянне пастановы не распаўсюджваецца на тавары, што перамяшчаюцца ў рамках міжнародных транзітных перавозак, якія пачынаюцца і заканчваюцца за межамі мытнай тэрыторыі ЕАЭС, а таксама тавары, перамяшчаемыя ў рамках міжнародных транзітных перавозак, што пачынаюцца за межамі мытнай тэрыторыі ЕАЭС і заканчваюцца ў дзяржаве - члене ЕАЭС. Дакумент не датычыцца і тавараў, якія змешчаны пад мытныя працэдуры ў дзяржаве - члене ЕАЭС, адрознай ад Беларусі, перамяшчаемых транзітам цераз тэрыторыю рэспублікі; якія паходзяць з дзяржаў - членаў ЕАЭС пры ўмове пацвярджэння іх паходжання сертыфікатам аб паходжанні тавару формы СТ-1.
Часовая мера не дзейнічае ў дачыненні да тавараў, кошт якіх у адпаведнасці з адным транспартным (перавозачным) дакументам не перасягае суму, эквівалентную 200 еўра.-0-
