Сцяг Нядзеля, 26 мая 2024
Усе навіны
Усе навіны
Эканоміка
04 сакавіка 2024, 12:59

Беларусь і Казахстан абмяркуюць магчымасць стварэння фонду прамысловай кааперацыі

Ерлан Байжанаў
Ерлан Байжанаў
4 сакавіка, Мінск /Кар. БЕЛТА/. Беларусь і Казахстан абмяркуюць магчымасць стварэння сумеснага двухбаковага фонду прамысловай кааперацыі. Аб гэтым расказаў журналістам Надзвычайны і Паўнамоцны Пасол Казахстана ў Беларусі Ерлан Байжанаў па выніках сустрэчы з Прэзідэнтам Беларусі Аляксандрам Лукашэнкам, перадае карэспандэнт БЕЛТА.

У час сустрэчы пасол падзяліўся ўражаннямі ад паездак па рэгіёнах Беларусі, падкрэсліўшы, што ён уражаны ўзроўнем тэхналагічнага развіцця і прамысловага патэнцыялу краіны.

У размове з журналістамі дыпламат больш падрабязна выказаўся на гэту тэму. Ён расказаў, што Казахстан зацікаўлены ў наладжванні супрацоўніцтва з такімі беларускімі прадпрыемствамі, як "Новус Індустры" з Магілёва (комплекс дрэваапрацоўчых і мэблевых фабрык), "Палімерканструкцыя" з Віцебска (кампанія, якая прапануе комплексныя рашэнні водаадвядзення і водазабеспячэння).

"Я бачу, што практычна ў кожным рэгіёне Беларусі ёсць некалькі кампаній, якія мы хацелі б бачыць працуючымі ў Казахстане", - звярнуў увагу Ерлан Байжанаў. Ён падкрэсліў, што размова ідзе не проста пра гандлёвыя пастаўкі, а менавіта пра лакалізацыю вытворчасці. "Гэта больш доўгатэрміновае і фундаментальнае супрацоўніцтва. Таму мы арыентуем беларускіх партнёраў на такі падыход", - сказаў дыпламат.
"Разумеем таксама, што для такіх інвестыцыйных праектаў патрэбна больш упэўненая падтрымка з боку дзяржаў, урадаў, фінансавых інстытутаў, - прадоўжыў ён. - Можна было б (і я такую ідэю прапанаваў) стварыць сумесны двухбаковы фонд прамысловай кааперацыі. Гэта адна з ідэй, якая сёння абмяркоўвалася".

У Беларусі зарэгістравана 55 прадпрыемстваў з казахстанскім капіталам, у тым ліку 17 сумесных і 38 замежных, а ў Казахстане дзейнічаюць больш за 170 суб'ектаў тавараправоднай сеткі айчынных прадпрыемстваў. Рэалізуюцца кааперацыйныя праекты па сумеснай вытворчасці трактарнай, сельскагаспадарчай, аўтамабільнай і прычапной, пажарнай і аварыйна-выратавальнай тэхнікі, а таксама ліфтавага абсталявання.

Тавараабарот дзвюх краін па выніках 2023 года склаў $1,1 млрд, у тым ліку экспарт Беларусі - $867 млн. З нашай краіны пастаўляюцца ў асноўным трактары, машыны і механізмы для ўборкі і малацьбы сельскагаспадарчых культур, сыры і тварог, малако і вяршкі, каўбасы і прадукты з мяса, мэбля, паўфабрыкаты з нелегіраванай сталі.-0-
Падпісвайцеся на нас у
Twitter
Топ-навіны
Свежыя навіны Беларусі