2 мая, Масква /Эдуард Півавар - БЕЛТА/. Праграма ІІ Еўразійскага эканамічнага форуму, які пройдзе 24-25 мая ў Маскве і будзе прымеркаваны да пасяджэння Вышэйшага Еўразійскага эканамічнага савета з удзелам кіраўнікоў дзяржаў - членаў Еўразійскага эканамічнага саюза і дзяржаў-наглядальнікаў, апублікавана на спецыяльным сайце. Аб гэтым БЕЛТА паведамілі ў фондзе "Раскангрэс", які з'яўляецца аператарам мерапрыемства.
"Еўразійскі эканамічны форум ставіць перад сабой мэту максімальна ахапіць актуальныя сферы ўзаемадзеяння ў рамках ЕАЭС. Праграма форуму ўключае разгляд пытанняў навукова-тэхнічнага супрацоўніцтва краін аб'яднання і выпрацоўкі сумесных падыходаў у сферах прамысловасці, экалогіі і энергетыкі, а таксама праблематыкі тэхнічнага і мытнага рэгулявання, арганізацыі ўнутранага рынку дзяржаў. Іншая немалаважная задача форуму - стварэнне пляцоўкі для наладжвання кантактаў бізнесу і дзяржаўных структур. Упэўнены, работа ў рамках форуму дасць магчымасць выпрацаваць канкрэтныя рашэнні ва ўсіх сферах шматбаковага супрацоўніцтва", - заявіў старшыня Калегіі Еўразійскай эканамічнай камісіі Міхаіл Мясніковіч.
Форум пройдзе пад дэвізам "Еўразійская інтэграцыя ў шматпалярным свеце". Ключавым мерапрыемствам стане пленарнае пасяджэнне, а ўсяго ў рамках ЕЭФ-2023 адбудзецца каля 35 дзелавых сесій, якія будуць падзелены на сем тэматычных напрамкаў.
У рамках трэка "Чалавечы капітал" эксперты абмяркуюць перспектывы раскрыцця турыстычнага патэнцыялу краін ЕАЭС, работу з маладымі талентамі, пытанні працоўнай міграцыі, міжвузаўскае навукова-тэхнічнае супрацоўніцтва і вопыт процідзеяння пандэміі каранавіруса.
Дыскусіі тэматычнага блока "Тэхналогіі і кааперацыя" будуць прысвечаны пытанням тэхналагічнага суверэнітэту як гарантыі энергетычнай і харчовай бяспекі, рэгуляванню ў сферы экалогіі, арганізацыі харчовага рынку і развіццю прадпрымальніцтва ў новых умовах. Акрамя таго, эксперты абмяркуюць аспекты функцыянавання адзінай сістэмы тэхнічнага рэгулявання ЕАЭС і зняцце бар'ераў у гандлі, а таксама стандартызацыю як інструмент забеспячэння бяспекі і якасці прадукцыі.
Удзельнікі сесій у рамках напрамку "ЕАЭС у зменлівым свеце" разгледзяць ключавыя напрамкі супрацоўніцтва паміж ЕАЭС, ШАС і БРІКС, валютна-фінансавае супрацоўніцтва і пераход на новыя формы разлікаў ва ўзаемным гандлі. Таксама адбудуцца бізнес-дыялогі, прысвечаныя супрацоўніцтву еўразійскага інтэграцыйнага фармату з Інданезіяй і краінамі Лацінскай Амерыкі.
Сесіі тэматычнага блока "Еўразійская спалучанасць" раскрыюць ключавыя пытанні лічбавага парадку дня: дзяржрэгуляванне ІТ-галіны, абарот персанальных даных на прасторы ЕАЭС і імпартанезалежнасць краін інтэграцыйнага аб'яднання на рынках праграмнага забеспячэння і тэлекамунікацыйнага абсталявання. Дыскусіі ў рамках гэтага напрамку таксама будуць прысвечаны міжнародным разлікам і лічбавым актывам, электроннаму гандлю, стварэнню Еўразійскай перастраховачнай кампаніі і новым крыніцам даных у статыстыцы ЕАЭС.
Удзельнікі трэка "Унутраны рынак ЕАЭС: мытнае супрацоўніцтва, канкурэнцыя і дзяржаўныя закупкі" абмяркуюць пытанні ўдасканалення права саюза ва ўмовах сучасных выклікаў і мытнага рэгулявання, лічбавыя сістэмы выяўлення згавораў на таргах і лічбавізацыю дзяржаўных закупак.
"Стратэгічны блок" стане пляцоўкай для абмеркавання "стратэгіі ЕАЭС - 2030+": удзельнікі адкажуць на пытанні аб тым, якой павінна быць ключавая мэта развіцця ЕАЭС на перыяд да 2045 года, якія канкрэтныя крокі неабходна рэалізаваць, каб забяспечыць дасягненне мэт развіцця інтэграцыйнага аб'яднання, а таксама якія новыя напрамкі стратэгічнага развіцця ЕАЭС.
На палях ІІ Еўразійскага эканамічнага форуму адбудуцца міжнародны кліматычны конкурс "Зялёная Еўразія", дзелавое снеданне Агенцтва стратэгічных ініцыятыў, прысвечанае абмеркаванню новых магчымасцей развіцця міжнароднага супрацоўніцтва ў Еўразіі, і дзелавое снеданне бізнес-дыялогу ЕАЭС - Інданезія. Акрамя таго, запланавана праграма Дзелавога савета ЕАЭС, якая прадугледжвае два мерапрыемствы: сесію, прысвечаную прадпрымальніцкай дзейнасці як драйверу еўразійскай эканамічнай інтэграцыі, а таксама пасяджэнне прэзідыума Дзелавога савета Еўразійскага эканамічнага саюза.-0-
