Сцяг Субота, 20 красавіка 2024
Усе навіны
Усе навіны
Культура
25 студзеня 2023, 16:29

У Мінаблвыканкаме назвалі аб'екты культурнай спадчыны, дзе ў бягучым годзе пройдуць рэстаўрацыйныя работы

25 студзеня, Мінск /Кар. БЕЛТА/. На якіх аб'ектах гісторыка-культурнай спадчыны Мінскай вобласці правядуць у бягучым годзе рамонтна-рэстаўрацыйныя работы, на прэс-канферэнцыі ў прэс-цэнтры БЕЛТА расказаў галоўны спецыяліст галоўнага ўпраўлення культуры Мінаблвыканкама Аляксандр Крывіцкі, перадае карэспандэнт БЕЛТА.

"Плануецца завяршэнне рамонтна-рэстаўрацыйных работ будынка былога ешыбота ў Валожыне. Гэта вельмі цікавы архітэктурны аб'ект, вялікую ўвагу мы ўдзяляем прылеглай тэрыторыі, хочам аднавіць першапачатковае аблічча гэтага аб'екта. Прадоўжацца ў нас работы па аднаўленні сядзібы "Наднёман" ва Уздзенскім раёне. Таксама ў Нясвіжскім раёне павінны пачацца рамонтна-рэстаўрацыйныя работы ў аграгарадку Сноў, гэта былы сядзібна-паркавы комплекс", - расказаў Аляксандр Крывіцкі.

Паводле яго слоў, вельмі вялікай і важнай работай стала рэстаўрацыя дзяржаўнага мемарыяльнага комплексу "Хатынь". "Работы вядуцца ў адпаведнасці з планам, і да канца сакавіка мы разлічваем завяршыць усе рэстаўрацыйныя работы на названым аб'екце", - паведаміў галоўны спецыяліст.

"У 2022 годзе прадоўжыліся работы па аднаўленні касцёла Божага Цела, які з'яўляецца значным помнікам архітэктуры ў Нясвіжы. Работы падыходзяць паступова да свайго лагічнага завяршэння, выходзіць вельмі прыгожы помнік", - дадаў ён.

Аляксандр Крывіцкі таксама расказаў, што аб'екты гісторыка-культурнай спадчыны Міншчыны актыўна ўключаюцца ў турыстычны абарот. "Мы адправілі спецыялістаў нашых музеяў Валожынскага, Клецкага і Мядзельскага раёнаў на навучанне ў Нацыянальнае агенцтва па турызме, дзе спецыялісты сталі акрэдытаванымі экскурсаводамі, распрацавалі экскурсійныя маршруты па гісторыка-культурных каштоўнасцях гэтых рэгіёнаў. Такім чынам нашы аб'екты, якія не былі ўключаны ў пэўны турыстычны абарот, паступова ўключаюцца ў гэты напрамак", - адзначыў ён.

"Усяго на тэрыторыі Мінскай вобласці знаходзіцца 682 аб'екты культурнай спадчыны, у тым ліку нематэрыяльныя. Найбольш вядомыя помнікі архітэктуры - гэта палацава-паркавы ансамбль і комплекс былога кляштара езуітаў у Нясвіжы. Архітэктурна-культурны комплекс рэзідэнцыі Радзівілаў у Нясвіжы ўключаны ў Спіс сусветнай культурнай і прыроднай спадчыны ЮНЕСКА. Але гэта не адзіная наша гордасць - у нас даволі шмат палацава-паркавых комплексаў з багатай гісторыяй і, спадзяёмся, багатай будучыняй. Асноўнай нашай задачай з'яўляецца захаванне гэтай спадчыны", - дадаў Аляксандр Крывіцкі.-0-

Падпісвайцеся на нас у
Twitter
Топ-навіны
Свежыя навіны Беларусі