ДЗЯРЖОРГАНЫДЗЯРЖОРГАНЫ
Флаг Аўторак, 29 лістапада 2022
Мінск -3°C
Усе навіны
Усе навіны
Культура
14 верасня 2022, 16:08

Прадстаўнікі 8 краін прымуць удзел у паэтычным марафоне Брэсцкай абласной бібліятэкі

Фота з архіва
Фота з архіва

14 верасня, Мінск /Кар. БЕЛТА/. Прадстаўнікі 8 краін прымуць удзел у міжнародным паэтычным марафоне "Чытаем куміраў разам з мірам" у Брэсцкай абласной бібліятэцы імя М.Горкага 15 верасня. Аб гэтым на прэс-канферэнцыі паведаміла намеснік дырэктара па асноўнай дзейнасці бібліятэкі Ларыса Верамчук, перадае карэспандэнт БЕЛТА.

"Наша прафесійнае свята Дзень бібліятэк у Брэсцкай абласной бібліятэцы мы адзначым святочнай праграмай LITERAbrest. У цэнтры яе - самы галоўны літаратурны юбілей нашай краіны ў гэтым годзе - 140-годдзе з дня нараджэння класікаў беларускай літаратуры Купалы і Коласа. І заўтра мы правядзём міжнародны паэтычны марафон "Чытаем куміраў разам з мірам". У ім прымуць удзел 60 чытальнікаў з 8 краін (18 гарадоў): прачытаюць каля 40 вершаў Купалы і Коласа на 9 мовах свету", - расказала Ларыса Верамчук.

Яна дадала, што на свяце бібліятэка прадставіць некалькі кніжных выстаў, правядзе квіз "Прывітанне, Янка! Прывітанне, Якуб!" і падвядзе вынікі фотаконкурсу "Злоўлены за чытаннем". "Спадзяёмся, свята атрымаецца вельмі змястоўным", - сказала намеснік дырэктара.

Брэсцкая абласная бібліятэка абслугоўвае каля 40 тыс. чытачоў. "Прычым як рэальных, так і віртуальных. Фонды нашай бібліятэкі налічваюць каля 800 тыс. экзэмпляраў дакументаў, мы арганізуем штогод 700-800 мерапрыемстваў рознага фармату для розных мэтавых аўдыторый", - падкрэсліла Ларыса Верамчук.

Паводле яе слоў, бібліятэка ўжо некалькі гадоў займаецца гістарычным кнігазнаўствам. "Самым вядомым і яркім праектам у гэтым напрамку з'яўляецца міжнародная навукова-практычная канферэнцыя "Берасцейскія кнігазборы". У 2017 годзе мы адкрылі ў нашай бібліятэцы сектар, а ў 2020 годзе паўнацэнны аддзел рэдкай кнігі. І ў гэтым аддзеле працуе музейная экспазіцыя, - расказала намеснік дырэктара. - Сёння наш аддзел рэдкай кнігі захоўвае больш за 3 тыс. дакументаў, сярод якіх шмат краязнаўчых дакументаў. Мы ганарымся ўнікальнымі рукапіснымі дакументамі, якія датычацца гісторыі Брэстчыны XVII-XIX стагоддзяў. А жамчужына нашага фонду - арыгінальны фрагмент Брэсцкай Бібліі".

Ларыса Верамчук таксама падзялілася планамі Брэсцкай абласной бібліятэкі на бліжэйшы час. "Мы і ў далейшым будзем папулярызаваць усе рэсурсы абласной бібліятэкі, больш шырока прадстаўляць яе на турыстычнай карце Брэстчыны, перш за ўсё праз работу на базе аддзела рэдкай кнігі і аддзела краязнаўства. Таксама плануем прадаўжаць ініцыяваць і рэалізоўваць праекты па стварэнні электронных інфармацыйных рэсурсаў, карпарацый з публічнымі бібліятэкамі Брэсцкай вобласці, ствараць новыя тэматычныя рэсурсы", - рэзюмавала намеснік дырэктара па асноўнай дзейнасці Брэсцкай абласной бібліятэкі.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі