Сцяг Субота, 18 мая 2024
Усе навіны
Усе навіны
Культура
08 лютага 2023, 11:46

Канцэрт "З днём нараджэння, Моцарт!" дадуць у Брэсцкай абласной філармоніі

8 лютага, Брэст /Кар. БЕЛТА/. У гасцёўні Брэсцкай абласной філармоніі сёння адбудзецца канцэрт "З днём нараджэння, Моцарт!", паведамілі карэспандэнту БЕЛТА ва ўстанове культуры.

Перад публікай выступіць камерны аркестр філармоніі пад кіраўніцтвам дырыжора Вячаслава Прылепіна і лаўрэат міжнародных конкурсаў салістка Белдзяржфілармоніі Алена Навуменка (фартэпіяна). Прагучаць вядомыя творы Моцарта: канцэрт для фартэпіяна з аркестрам нумар 23 ля мажор, дывертысмент для струннага аркестра рэ мажор, "Ронда ў турэцкім стылі", "Адажыа і фуга", санаты. Праграма вечара разлічана прыблізна на 1 гадзіну 10 мінут.

"Мы планавалі канцэрт з Аленай Навуменка на канец студзеня. І так атрымалася, што дата супала з днём нараджэння Моцарта. Таму вырашылі прысвяціць увесь канцэрт гэтаму вялікаму кампазітару. Праўда, з-за гастролей яго давялося крыху перамясціць па часе. Асноўны акцэнт мы зрабілі, вядома, на камернай музыцы Моцарта. Большая частка твораў, якія прагучаць, напісаны менавіта ім. У праграму таксама ўключылі некалькі сачыненняў Гайдна і Бетховена - венскіх класікаў, з якімі Моцарт перасякаўся", - расказаў Вячаслаў Прылепін.

Аўстрыйскі кампазітар і музыкант-віртуоз Вольфганг Амадэй Моцарт нарадзіўся 27 студзеня 1756 года ў Зальцбургу. Гэта адзін з самых папулярных класічных кампазітараў, які аказаў вялікі ўплыў на сусветную музычную культуру. У адрозненне ад многіх кампазітараў XVIII стагоддзя Моцарт не проста працаваў ва ўсіх музычных формах свайго часу, але і дабіўся ў іх вялікага поспеху. Многія з яго сачыненняў прызнаны шэдэўрамі сімфанічнай, канцэртнай, камернай, опернай і харавой музыкі.

У бліжэйшыя дні камерны аркестр абласной філармоніі прадоўжыць цыкл канцэртаў пад назвай "Organ vs Orchestra" ў Крыжаўзвіжанскім касцёле Брэста. У якасці саліста выступіць Калініка Мядзведзева (арган). "Першапачаткова планаваўся адзін канцэрт на 21 лютага. Але было так шмат жадаючых, а білеты так хутка раскупілі, што мы вырашылі зрабіць яшчэ адно выступленне 18 лютага. І на гэты дадатковы канцэрт таксама ўсе білеты прададзены. Прычым, паводле слоў распаўсюджвальнікаў, амаль усе іх выкупілі для калектыву "Брэстгазаапарата". Гэта вельмі добра, калі людзі, якія класіку асабліва не слухалі, прыйдуць у касцёл, калі будзе гучаць арган і аркестр зверху - гэта ўражальна ўздзейнічае", - адзначыў галоўны дырыжор камернага аркестра.

У сакавіку калектыў будзе актыўна гастраляваць па рэгіёнах: у графіку паездак - Салігорск, Пінск, Пружаны.-0-

Падпісвайцеся на нас у
Twitter
Топ-навіны
Свежыя навіны Беларусі