31 мая, Брэст /Кар. БЕЛТА/. У мемарыяльным комплексе "Брэсцкая крэпасць-герой" 1 і 2 чэрвеня адбудзецца XV Рэгіянальная творчая акцыя "Малююць дзеці", паведамілі карэспандэнту БЕЛТА ў мемарыяльным комплексе.
Акцыя стала ўжо традыцыйнай. Яе праводзяць з 2008 года ў Міжнародны дзень абароны дзяцей. Для ўдзелу ў ёй запрашаюць дзяцей 9-17 гадоў. На гэты раз арганізатары чакаюць, што ў крэпасць прыедуць маляваць каля 100 школьнікаў з Брэста, Брэсцкага і іншых раёнаў вобласці. Гэта акцыя прысвечана Году міру і стварэння, асноўная тэма - летапіс Брэсцкай крэпасці.
На тэрыторыі мемарыяльнага комплексу 1 чэрвеня пройдзе пленэр. Дзеці ў тым ліку змогуць размясціцца са сваімі палотнамі ў Музеі абароны Брэсцкай крэпасці, экспазіцыях "Музей вайны - тэрыторыя міру", "Летапіс Брэсцкай крэпасці", "Абарона Усходняга форта".
Хлопчыкам і дзяўчынкам прапанавалі стварыць малюнкі ў дзвюх намінацыях. Першая называецца "Заходні фарпост Айчыны". Дзеці могуць адлюстраваць жыццё і быт крэпасці ў час будаўніцтва, работу ваенных інжынераў па праектаванні ўмацаванняў і фартоў у XIX - пачатку XX стагоддзяў. Намінацыя "Гарачы чэрвень 1941-га..." прысвечана падзеям гераічнай абароны Брэсцкай крэпасці. Школьнікам прапанавалі намаляваць, якімі яны ўяўляюць падзеі, што разгарнуліся ў цытадэлі ў першы месяц Вялікай Айчыннай вайны, удзельнікаў абароны і іх подзвіг.
Журы ацэніць работы ўдзельнікаў 2 чэрвеня. У той жа дзень адбудзецца падвядзенне вынікаў і ўрачыстае ўзнагароджванне пераможцаў. Іх вызначаць у трох узроставых катэгорыях. Аўтарам лепшых малюнкаў уручаць дыпломы і каштоўныя прызы.
У акцыі сёлета з'явілася новаўвядзенне. Дзеці з раёнаў Брэсцкай вобласці, іншых рэгіёнаў Беларусі і нават з-за мяжы змогуць паўдзельнічаць у конкурсе творчых работ. "Не ва ўсіх атрымліваецца прыехаць і паўдзельнічаць у акцыі ў Брэсцкай крэпасці. Даём магчымасць праявіць сябе дзецям з іншых рэгіёнаў. Для іх прапанавана тэма "Тут кожны камень - помнік героям". Дзеці могуць адлюстраваць на палатне свае мемарыялы, памятныя мясціны. Работы яны павінны даслаць да 22 чэрвеня", - адзначыла загадчыца навукова-асветнага аддзела мемарыяльнага комплексу "Брэсцкая крэпасць-герой" Іна Кавальчук.
Лепшыя творы ўдзельнікаў пленэру і конкурсу творчых работ прадставяць на выставе, што адкрыецца ў Музеі абароны Брэсцкай крэпасці 21 верасня - у Міжнародны дзень міру.
Акцыю "Малююць дзеці" праводзяць для павышэння цікавасці да гісторыі Брэсцкай крэпасці, выхавання патрыятызму і пачуцця нацыянальнага гонару за мінулае Айчыны, захавання гістарычнай памяці пра Вялікую Айчынную вайну. Дарэчы, 1 чэрвеня - асаблівая дата ў гісторыі Брэсцкай крэпасці. У гэты дзень у 1836 годзе быў закладзены першы камень у падмурак будучай казармы ў цытадэлі.
Арганізатарамі акцыі "Малююць дзеці" выступаюць мемарыяльны комплекс "Брэсцкая крэпасць-герой" і абласное аддзяленне Беларускага фонду міру.-0-
