ДЗЯРЖОРГАНЫДЗЯРЖОРГАНЫ
Флаг Панядзелак, 24 студзеня 2022
Мінск Суцэльная воблачнасць -14°C
Усе навіны
Усе навіны
Культура
29 лістапада 2021, 16:00

Беларускую сядзібу плануюць аднавіць у музеі Іркуцкай вобласці

Фота з архіва
Фота з архіва

29 лістапада, Брэст /Кар. БЕЛТА/. Экспазіцыю "Беларуская сядзіба" плануецца стварыць у 2022 годзе на тэрыторыі архітэктурна-этнаграфічнага музея "Тальцы" ў Іркуцкай вобласці. Такая інфармацыя прагучала сёння на шостым пасяджэнні рабочай групы па супрацоўніцтве Беларусі і Іркуцкай вобласці, перадае карэспандэнт БЕЛТА.

Сфарміраваць экспазіцыю мяркуецца пры садзейнічанні Беларускага дзяржаўнага музея народнай архітэктуры і побыту. Размешчаны на правым беразе Ангары музей "Тальцы" ўяўляе сабой унікальны збор помнікаў драўлянага дойлідства пад адкрытым небам. Туды будзе перавезены дом беларускіх перасяленцаў з сяла Тургенеўка Баяндаеўскага раёна. Праект задуманы з мэтай паказаць матэрыяльную культуру беларускіх сялян, якія перасяліліся ў Іркуцкую губерню ў пачатку ХХ стагоддзя па сталыпінскай аграрнай рэформе.

"Мне здаецца, за гэтым ёсць перспектыва. Музей у Тальцы, яго развіццё, удасканаленне мы разглядаем як прыярытэтны праект. Думаю, гэта будзе цікава для жыхароў і Беларусі, і Расіі. Калі вашы спецыялісты прыедуць, мы вызначым месца і далей будзем працаваць", - сказаў губернатар Іркуцкай вобласці Ігар Кобзеў. Ён таксама прапанаваў запрасіць на наступнае пасяджэнне рабочай групы кіраўніцтва беларускай дыяспары.

Акрамя гэтага праекта ў планах на наступны год і іншыя сумесныя мерапрыемствы ў культурнай сферы. Так, Іркуцкі абласны мастацкі музей імя Сукачова плануе правядзенне фестывалю "Дружбы", у якім традыцыйна прымае ўдзел таварыства беларускай культуры імя Яна Чэрскага. На працягу 2022 года Цэнтр культуры карэнных народаў Прыбайкалля плануе для іркуцкіх педагогаў анлайн-майстар-класы па дэкаратыўна-прыкладным мастацтве з удзелам майстроў Беларусі. На базе Брацкага музычнага вучылішча адбудуцца гульнявыя і музычныя мерапрыемствы "Беларускія вячоркі".

Тэатр-студыя "Тэатр пілігрымаў" прапрацоўвае магчымасць рэалізацыі ў 2022 годзе праекта аб вайне "У імя міру". Мэта праекта - стварэнне міжнароднай калабарацыі тэатраў і музеяў воінскай славы. Мемарыяльны комплекс "Брэсцкая крэпасць-герой" пацвердзіў ужо сваю згоду на сумесны ўдзел у міжнародным некамерцыйным праекце.

Шостае пасяджэнне рабочай групы па супрацоўніцтве Беларусі і Іркуцкай вобласці прайшло ў анлайн-фармаце. З беларускага боку перагаворы ўзначаліў старшыня Брэсцкага аблвыканкама Юрый Шулейка, які распараджэннем прэм'ер-міністра замацаваны адказным за каардынацыю супрацоўніцтва. Сустаршынёй з расійскага боку выступіў губернатар Іркуцкай вобласці Ігар Кобзеў. У канферэнцыі прынялі ўдзел прадстаўнікі міністэрстваў і ведамстваў. Удзельнікі абмеркавалі ход рэалізацыі пагаднення аб гандлёва-эканамічным, навукова-тэхнічным, культурным і гуманітарным супрацоўніцтве на 2020-2022 гады.

Сёмае пасяджэнне рабочай групы пройдзе ў другой палове 2022 года. Канкрэтная дата правядзення і фармат мерапрыемства будуць вызначаны з улікам эпідабстаноўкі.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі