Міжнародны дзень абароны дзяцей - важнае свята, якое не пакідаюць без увагі многія ўстановы культуры. Так, 1 чэрвеня для юных гледачоў адкрыў дзверы Вялікі тэатр Беларусі. Хлопчыкі і дзяўчынкі разам з бацькамі змаглі пабываць у маляўнічых фотазонах з рэквізітам са спектакляў, сустрэць герояў казак, стварыць эскіз касцюмаў да спектакля, пабываць на музычным і танцавальным майстар-класах і на шоу мыльных бурбалак. Карэспандэнт БЕЛТА пабывала на акцыі "Вялікі тэатр - дзецям Беларусі" і даведалася, што запомнілася гасцям тэатра больш за ўсё.
"Вялікі тэатр Беларусі сёлета асаблівую ўвагу ўдзяліў праграме работы з дзецьмі. Гэта акцыя паказала ўсё самае лепшае, святочнае і музычнае для самых маленькіх гледачоў. У нашай праграме прынялі ўдзел не толькі артысты тэатра, але і студэнты 1-2-х курсаў Беларускай дзяржаўнай акадэміі музыкі, якія падрыхтавалі музычную казку "Лятучы карабель", - расказала рэжысёр праграм акцыі Марыя Ісаева.
"Адной з лакацый мерапрыемства стала камерная зала, у якой дзіцячая студыя Вялікага тэатра правяла майстар-клас па тэхніках вакальнага дыхання і распеву. У малой зале прайшла праграма "Мама, тата, я - культурная сям'я", у якой артысты нашага тэатра разам са сваімі дзецьмі прадставілі невялікую канцэртную праграму. Я лічу, што гэта бясконцы гонар, калі бацькі перадаюць захапленне мастацтвам сваім дзецям", - расказала загадчыца трупы дзіцячага музычнага тэатра-студыі Вялікага тэатра Беларусі Алена Няронская.
Яна дадала, што адной з галоўных падзей вечара стаў грандыёзны канцэрт, у якім рэжысёр Галіна Галкоўская злучыла ў адной пастаноўцы тры казкі - "Чарадзейная музыка", "Пінокіа" і "Снежная каралева".
Дзеці і іх бацькі змаглі паўдзельнічаць у экскурсіі па Вялікім тэатры. "Пры падрыхтоўцы гэтай праграмы мы карысталіся нашай звычайнай экскурсіяй, у рамках якой мы паказваем, магчыма, крыху больш, чым сёння. Але ў час дзіцячага свята мы вырашылі правесці экскурсіі міні-фармату, дзе расказваем пра гісторыю тэатра, пра тое, як ствараюцца касцюмы, пра сцэну. Мы робім гэта для таго, каб дзеці з самых юных гадоў прывыкалі да тэатра і сталі нашымі будучымі гледачамі", - расказаў спецыяліст арганізацыйна-творчага ўпраўлення Вялікага тэатра Максім Лунеў.
Ульяна Пужэвіч і Вікторыя Кушнер прыйшлі ў тэатр разам з бабуляй Вікторыі і засталіся пад вялікім уражаннем ад акцыі. "Больш за ўсё мяне зацікавіў балетны майстар-клас", - прызналася Ульяна Пужэвіч.
Балетны майстар-клас з нецярпеннем чакалі і вучаніцы Беларускай дзяржаўнай харэаграфічнай гімназіі-каледжа Ксенія Гаўрылава і Марыя Жоўна. "Мы ўбачылі афішу мерапрыемства ў інтэрнэце. Раней мы ўжо былі на такім майстар-класе ў Вялікім тэатры, і ён нам вельмі спадабаўся. У будучым нам вельмі хацелася б самім стаць балерынамі Вялікага тэатра", - заўважыла Ксенія Гаўрылава.
Дзеці змаглі не толькі вывучыць некаторыя балетныя пазіцыі, але і сыграць на музычных інструментах. "Для гэтага майстар-класа мы выбралі марымбу і вібрафон, таму што яны гучаць вельмі мякка і ідэальна падыходзяць для дзяцей. У канцы нашага выступлення кожнае дзіця абсалютна свабодна падыходзіла да інструмента і ўяўляла сябе ў ролі сапраўднага музыканта", - расказаў музыкант Вялікага тэатра Аляксандр Цірыбінін.
Так, Ягора Бажкова больш за ўсё ўразіла музычная казка, у той час як сястру зацікавіў балет. Ён, як і многія іншыя хлопцы і дзяўчаты, быў рады магчымасці пабываць у тэатры і паглядзець на яго работу знутры.
Валерыя ГАЎРУКОВІЧ,
БЕЛТА.-0-
