25 мая, Мінск /Кар. БЕЛТА/. Балет Вялікага тэатра Беларусі адпраўляецца на гастролі па гарадах Расіі, якія прадоўжацца з 25 мая па 8 чэрвеня, паведамілі БЕЛТА ў Вялікім.
Вялікі тэатр Беларусі прадставіць жыхарам расійскіх гарадоў Іашкар-Алы, Казані, Уфы, Чэлябінска, Цюмені балетныя спектаклі, якія заўсёды збіраюць аншлагі ў Мінску, - балеты "Лебядзінае возера" і "Ганна Карэніна". У гастрольны тур адпраўляюцца больш за 60 чалавек.
Пачнуцца гастролі 25 мая - на сцэне Марыйскага дзяржаўнага тэатра оперы і балета імя Э.Сапаева будзе гучаць музыка П.Чайкоўскага, Беларускі балет пакажа пастаноўку Вольгі Кастэль "Ганна Карэніна".
Гэты ж балет будзе паказаны на сцэне Татарскага акадэмічнага дзяржаўнага тэатра оперы і балета імя Мусы Джаліля 26 і 27 мая - у ходзе ХХХVI Міжнароднага фестывалю класічнага балета імя Р.Нурыева ў Казані.
Далей спектакль "Ганна Карэніна" ўбачаць у Башкірскім дзяржаўным тэатры оперы і балета ва Уфе - 30 і 31 мая.
З 2 па 6 чэрвеня Вялікі тэатр Беларусі ўпершыню выступіць на сцэне Чэлябінскага дзяржаўнага акадэмічнага тэатра оперы і балета імя М.І.Глінкі. У час XIV Міжнароднага фестывалю балета "У гонар Кацярыны Максімавай" будуць паказаны балеты "Лебядзінае возера" і "Ганна Карэніна". Дырыжыраваць гэтымі спектаклямі ў Чэлябінску будзе дырыжор беларускага Вялікага тэатра, заслужаны дзеяч мастацтваў Беларусі Мікалай Калядка.
Завершацца гастролі 8 чэрвеня ў Цюменскай філармоніі паказам балета "Ганна Карэніна".
Галоўныя партыі ў пастаноўках выконваюць вядучыя салісты балета Вялікага тэатра: народныя артысты Беларусі Антон Краўчанка, Ігар Артамонаў, заслужаныя артысты рэспублікі Людміла Хітрова, Марына Вежнавец, Юрый Кавалёў, а таксама Канстанцін Белахвосцік, Вікторыя Трэнкіна, Таццяна Уласень, Уладзімір Руда і інш.-0-
